LEES OOK: Verbruikers gewaarsku teen ‘laybuy’
Vier mense, insluitend twee stadsamptenare wat na bewering betrokke was by ‘n behuisingbedrogspul, is vasgetrek. Minstens 11 mense is uit byna R1 miljoen deur hierdie bedrog bedrieg.
Die Nasionale Vervolgingsgesag (NVG) het bevestig dat twee van die beskuldigdes Donderdag hulle eerste hofverskyning in die Blue Downs-landdroshof gemaak het, waar die saak uitgestel is en vandag saam met die ander beskuldigdes aangehoor sou word.
Die twee stadsamptenare van 51 en 55 jaar oud, saam met die twee ander verdagtes van 28 en 36 jaar, staan tereg op 11 aanklagte van bedrog. Hulle word aangekla van die onwettige verkoop van munisipale erwe by die Stad se Uitbreiding 2 Mfuleni-projek.
Die Stad het verlede jaar die erwe aan kwalifiserende begunstigdes beskikbaar gestel vir die ontwikkeling van bekostigbare behuising. Die twee stadsamptenare het na bewering die ander twee beskuldigdes op bedrieglike wyse genader om te vra of hulle weet van iemand wat erwe direk by hulle wil koop. Daar word beweer dat hulle hul prys op R100 000 vasgestel het en 11 voornemende kopers het bedrae vir dié erwe direk aan die vier beskuldigdes betaal.
“Gesoute speurders verbonde aan die Wes-Kaapse handelsmisdaadeenheid is aangewys om bewerings van bedrog te ondersoek nadat die Stad Kaapstad verlede jaar erwe vir ‘n behuisingsontwikkeling in Ext 2 in Mfuleni beskikbaar gestel het,” het Andrè Traut, polisiewoordvoerder, gesê.
“Twee amptenare van die Stad Kaapstad het met twee ander saamgewerk om hierdie erwe te bemark en met hul kriminele skema het hulle 11 voornemende kopers oorreed om groot bedrae geld in ’n bankrekening te deponeer wat met die twee amptenare gedeel is.”
Traut het gesê die skema het gelei tot ‘n finansiële verlies van R900 000 vir slagoffers wat betaal het vir vaste eiendom waarvan hulle nooit eienaarskap ontvang het nie. Mfuleni-wyksraadslid, Ernest Madikane, het gesê soortgelyke skemas het na bewering alreeds vir jare lank voortgeduur.
#Kaapstad #Behuising #Bedrog #Afrikaans #Nuus
