‘n Verdagte wat gesoek is vir die beweerde diefstal van watermeters en koperpype is vanoggend in Parkgate KZN in hegtenis geneem.
’n Lid van die Mountview-gemeenskapspolisiëringsforum (GPF) het Reaction Unit South Africa (Rusa) omstreeks 10:32 gekontak om bystand te versoek om die vermeende dief vas te trek wat glo in Parkgate in KZN opgespoor is.
Volgens die lid was hy glo in besit van kringtelevisiebeeldmateriaal wat die verdagte met diefstalle in Mountview KZN verbind.
Reaksiebeamptes is onmiddellik uitgestuur en het die klaer ongeveer 500 meter van waar hy die verdagte opgemerk het, ontmoet. Beamptes het die gebied omsingel en die man genader.
Tydens ‘n onderhoud het die verdagte glo bevestig dat hy verantwoordelik was vir verskeie diefstalle in Mountview, Parkgate en Brindhaven. Die gesteelde watermeters en koper word na bewering aan ongeregistreerde skrootmetaalhandelaars in Parkgate en Palmview KZN verkoop. Die verdagte is volgens Rusa voorheen in Ottawa KZN deur reaksiebeamptes vir diefstal in hegtenis geneem.
Hy het na bewering ‘n vonnis van ‘n maand in die Westville-gevangenis vir die misdaad uitgedien.
Die 21-jarige word tans by SAPD Verulam aangehou.
