‘n Durbanse gesin was onlangs uit die veld geslaan toe die Suid-Afrikaanse Poskantoor hulle – 13 jaar ná die pakkie gepos is – laat weet het dat dié pakkie by hulle plaaslike poskantoor afgehaal kan word.
Sanja Hanekom vertel op sosiale media hoe sy en haar man stomgeslaan was toe hulle ‘n kennisgewing oor ‘n pakkie in hulle posbus ontvang het. Sy vertel die kennisgewing het gemeld daar is ‘n pakkie vir hulle by hulle plaaslike poskantoor en dat hulle ongeveer R65 moes betaal om die pakkie te kry.
“Omdat ons nie ‘n pakkie verwag het nie, was ons baie deurmekaar toe ons uitvind dat ‘n pakkie met my man se naam en ons adres by die poskantoor gehou word. Ons het gejaag om die pakkie te gaan haal, veral omdat ons wou sien waaroor dit alles gaan.”
Hanekom en haar man het op pad na die poskantoor gewonder wat die pakkie kon bevat, Hanekom noem selfs dat sy gehoop het die pakkie is vol banknote.
Sy vertel hulle het by die toonbank gestaan toe die werkgewer die groot, swaar, vernielde pakkie met ‘n oormatige hoeveelheid kleefband aan hulle oorhandig het. Toe Hanekom se man vra van wie af die pakkie kom, het hulle in ongeloof na die stempel gestaan en kyk – die pakkie is in 2010 gestuur.
“My man kon nie sy oë glo nie. ‘Dit kan nie wees nie, dit is 13 jaar gelede?'”
Hanekom sê die verlore pakkie is 13 jaar gelede, deur haar pa, aan die paartjie gestuur toe hulle kind gebore is.
“Liewe Suid-Afrikaners. Moenie bekommerd wees nie. Die Suid-Afrikaanse Poskantoor sal mooi na jou pakkie kyk en dit op sy tyd aflewer – dit is nou as jy nog lewend is en nie na ‘n ander adres getrek het nie. As jy ‘n pakkie vermis, moenie hoop verloor nie, jou pakkie rus by die poskantoor se pakkamer en sal veilig aan jou gestuur word as die tyd reg is.”
S. Hanekom
