Meer as 190 000 onwettige bestuurslisensies is aan provinsiale LUR’e gestuur vir kansellasie.
Die minister van vervoer, Fikile Mbalula, het Maandag aangekondig dat die departement werk om korrupsie en bedrog by die bestuurslisensie-toetssentrums (DLTC) te beëindig.
Die ondersoeke volg op ’n proklamasie wat in 2017 gemaak is vir ondersoeke na kwessies van bestuurslisensies, leerlinglisensies, professionele bestuurderspermitte, padwaardigheidsertifikate en omskakeling van buitelandse lisensies na plaaslike lisensies.
Mbalula het gesê die SIU het sedertdien ‘n tussentydse verslag voorgelê wat ‘n aantal administratiewe aksies identifiseer wat deur verskeie owerhede geneem moet word. Die eenheid het tot 31 Maart 2023 om die ondersoeke af te handel en ‘n finale verslag voor te lê.
Tot dusver het die SIU korrupsie en kriminele aktiwiteite ontbloot wat by DLTC’s regoor die land plaasvind.
Mbalula het gesê ondersoeke het aan die lig gebring dat daar nalatige en onbevoegde amptenare in dié sentrums werk met swak bestuur en toesig oor hul prestasie.
Sedert die ondersoek begin het, is 99 dokumente van skulderkenning ter waarde van R45 miljoen onderteken.
Meer as R52 miljoen is teruggevind deur die beslaglegging op onwettig ingevoerde voertuie tydens gesamentlike operasies ten opsigte van 375 voertuie wat in die Oos-Kaap teruggevind is.
Meer as 190 000 bestuurslisensies is aan relevante LUR’e gestuur vir kansellasie en nog 190 000 bestuurslisensies wat uitgereik is aan persone wat sedertdien gesterf het, is ook vir kansellasie verwys.
Altesaam 44 sake is na die NVG vir vervolging verwys en 128 sake is na owerhede vir dissiplinêre stappe oorgedra.
Altesaam 88 inhegtenisnemings is gemaak vir bedrog in ‘n gesamentlike operasie met die Valke en SA-inkomstediens. Dit sluit in 36 voertuigtoetseksaminatore, 10 Natis-beamptes en 26 DLTC-beamptes, drie polisiebeamptes, vier vervoerinspekteurs van die provinsiale departement en sewe burgerlikes.
Bronne: Sowetan LIVE, IOL
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
Lees ook: Hof beslis in guns van Mpho Phalatse
