Fatima Abdool (53), voormalige sepiester wat veral bekend is vir haar rolle in Binnelanders, Scandal, Song vir Katryn en 7de Laan, het nou die ligte en kameras vir aksie in die politieke wêreld verruil.
Eens van Eersterust in die ooste van Pretoria, is Abdool nou ingesweer as raadslid vir die United Independent Movement (UIM) in die Stad Johannesburg (CoT).
As die enigste vise-president van ‘n politieke party in die land, laat Abdool nie oor haar loop nie en sy is beslis nie skaam om haar mening te lug nie.
Pla dit haar dat mense sê sy is die enigste bruin vise-president?
“Natuurlik nie,” sê sy laggend.
“Dit gaan nie daaroor om bruin of wit of swart te wees nie, dit gaan oor die passie vir jou mense en of jy die werk kan doen. Ek is geen ‘window dressing’ nie en ek is beslis geen kwota-aanstelling nie.”
Abdool was veral bekend vir haar rol as Matrone Ria de Witt in die M-Net sepie Binnelanders, van 2005-2009.
Sy sê dit is hoogtyd dat vroue in hierdie land erken word vir hul krag en vertrou word met die groei van hierdie land.
“My party erken dit en daarom het hulle nie twee keer gedink toe hulle ‘n vrou aangestel het nie.”
Abdool noem haarself ‘n gemeenskapsaktivis en sy het sedert haar 20’s gewerk om haar gemeenskap te verbeter.
“Ek het my toneelspelvaardighede gebruik en gratis gemeenskapsprogramme vir kinders aangebied, deur hulle lewensvaardighede, waardes en morele etiket te leer deur die kuns van toneelspel.”
“Gemeenskapswerk was nog altyd die middelpunt van my lewe.”
Sy het betrokke geraak om slagoffers van mishandeling te help, al was dit net om te luister of om ondersteuning by die polisiestasie te bied. Sy voorsien die polisie van klere vir slagoffers van geslagsgebaseerde geweld wat in nood is.
Terwyl Abdool besig was met die lewe, het sy ‘n vreesaanjaende reis begin saam met haar seun wat op die ouderdom van 18 ‘n dwelmverslaafde geword het.
“Hierdie sagte siel, hierdie kind vir wie ek so lief is, het soos so baie jong mense ‘n slagoffer geword en aan dwelms verslaaf geraak. Maar na soveel jare se verslawing is my seun uiteindelik op pad na herstel. Ek is bly om te rapporteer dat hy na 13 jaar van dwelmmisbruik veilig en gesond in ‘n rehabilitasiesentrum is en dit gaan goed met hom.”
“Ek is net so trots op my dogter, wat ek my jong leeuwyfie noem, want as ek moeg geveg is, gaan sy voort met die stryd om haar broer se lewe. Ek is baie trots op albei my kinders,” het sy bygevoeg.
Haar professionele TV-rolle was in Scandal, Song vir Katryn, Binnelanders en in 7de Laan.
“Dit was baie lekker om op te tree, maar dit was nog nooit my prioriteit om ’n bekende akteur te wees nie, want my hart was by my gemeenskap.”
Abdool het die grootste deel van haar volwasse lewe tussen Johannesburg en Pretoria gewoon en is bekend vir aktivisme in hierdie gebiede. Sy gebruik steeds haar kreatiewe vaardighede om gemeenskappe te help.
“Die afgelope paar maande het die lot van ons jeug en kinders vir my baie duidelik geword. Die mense wat die land bestuur, het voeling met ons stryd verloor. Ek bevind myself op ‘n plek waar ek moet opstaan om ‘n verskil te maak. Ek is hier om ons mense in Suid-Afrika te dien.”
“Toe ek deur die president van die UIM genader is om by die party aan te sluit, was ek gereed, want ek dink God het my die hele tyd voorberei. Toe ek gevra is om die vise-president te wees, het ek gedink God, U beweeg baie vinnig, maar as dit is waar U wil hê ek moet wees, sal dit so wees,” het Abdool laggend gesê.
Virginia Keppler-Young, Fatima se vriendin, aktivis en mede-stigter van Rea Thusa/We Help wens haar alle voorspoed toe in haar nuwe loopbaan en weet sy gaan haar passie uitleef om ‘n verskil te maak.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
