Russiese magte het ‘n groot militêre aanval op die Oekraïne geloods met berigte van ontploffings naby groot stede wat regoor die land opduik.
In ‘n pre-dagbreek TV-verklaring het die Russiese president Vladimir Putin gesê Rusland beplan nie om Oekraïne te beset nie, maar het gesê Moskou se reaksie sal “onmiddellik” wees as iemand dit probeer keer.
Kort daarna is aanvalle op Oekraïense militêre teikens aangemeld. Oekraïne het gesê dat “Putin ‘n volskaalse inval in die Oekraïne geloods het”.
In ‘n videoverklaring Donderdagoggend het die Oekraïense president Volodymyr Zelensky gesê krygswet word nou oor die hele Oekraïne ingestel.
Hy het gesê Rusland het aanvalle op die Oekraïne se militêre infrastruktuur en grenswag-eenhede uitgevoer.
Berigte kom ook van ontploffings in verskeie Oekraïense stede, en geweervuur naby Boryspil-lughawe in die hoofstad Kiev.
Waarskuwingsirenes is in die stad met ‘n bevolking van sowat drie miljoen gehoor.
In reaksie op Rusland se aanval het die Amerikaanse president Joe Biden gesê Washington en sy bondgenote sal op ‘n verenigde en beslissende manier reageer op ‘n “onuitgelokte en ongeregverdigde aanval deur Russiese militêre magte” op die Oekraïne. “President Putin het ’n oorlog met voorbedagte rade gekies wat ’n katastrofiese lewensverlies en menslike lyding sal meebring,” het Biden gesê. “Die wêreld sal Rusland aanspreeklik hou.”
Die Britse premier, Boris Johnson, het gesê hy is “ontsteld oor die verskriklike gebeure in die Oekraïne” en dat president Putin “’n pad van bloedvergieting en vernietiging gekies het deur hierdie onuitgelokte aanval te loods”.
Hy het bygevoeg dat hy met die Oekraïense president gepraat het om te bespreek hoe om te reageer en beloof beslissende optrede deur die VK en bondgenote.
Bronne: BBC, MSN
Lees ook: NVG het bevestig daar is nog geen wysigings aan Ace Magashule se korrupsieklagte nie
