Die polisie in Florida ondersoek die dood van ‘n fietsryer wat van ‘n ophaalbrug doodgeval het toe dit oopgegaan het terwyl sy dit wou oorsteek.
Die slagoffer is Sondag net ná 13:00 met haar fiets op die sypaadjiegedeelte van die Royal Park-brug, wat West Palm Beach met Palm Beach verbind, gesien stap.
Mike Jachles, woordvoerder van die West Palm Beach-polisie, sê die vrou was binne 3 m van die punt van die verhoogde gedeelte van die brug toe dit begin styg het.
’n Manlike omstander op ’n skaatsplank, wat etlike meter van die slagoffer op die vaste deel van die brug was, het onsuksesvol probeer om die vrou, wat aan die reling vasgehou het, vas te gryp.
Sy het haar greep verloor en vyf tot ses verdiepings onder die brug op ‘n betonvloer geval, het Jachles gesê.
Teen Maandagmiddag kon die polisie nog nie die vrou identifiseer nie. Sy het volgens Jachles nie identifikasie gehad nie. Hy het haar beskryf as ‘n ouer vrou en moontlik ‘n inwoner van West Palm Beach.
Ondersoekers werk nou om te bepaal hoe die brug oopgegaan het voordat dit van voetgangers skoongemaak is en of enige veiligheidsprotokolle oortree is, het Jachles gesê. “Daar is waarskuwingstekens en daar is veiligheidsprosedures in plek vir die brugtenders om te volg, met veelvuldige stappe en veelvuldige lae van kontrolering om seker te maak dat daar geen motors of mense op die brug is wanneer dit opgaan nie,” het Jachles aan CNN-filiaal gesê. “Dit is dus alles deel van die ondersoek, om te bepaal of die prosedure gevolg is en of hierdie vrou oorgesteek het nadat die seine af was,” het hy gesê.
CNN het na Florida se departement van vervoer en Florida Drawbridges Inc. uitgereik vir ‘n verklaring. Die brug was Sondag vir byna ses uur gesluit terwyl die polisie die toneel ondersoek het. Geen ander beserings is aangemeld nie.
Bron: CNN, The Independent
