PRETORIA. – Reshay Ramsamy Naidoo (32), die prokureur wat na bewering betrokke is by die massiewe ondersoek na bedrog en korrupsie, is op borgtog vrygelaat nadat hy gister vlugtig in die landdroshof in Pretoria verskyn het.
Naidoo het homself op 23 Maart 2021 aan die Nasionale Kommisaris se taakspan vir korrupsie oorhandig.
Lees die vorige artikel hier.
Uit op borg
Sindisiwe Twala, woordvoerder vir die Nasionale Vervolgingsgesag van Suid-Afrika, sê Naidoo is borgtog van R5 000 toegestaan ná sy verskyning op aanklagte van geldwassery, diefstal, bedrog en oortreding van die Wet op die Voorkoming van Georganiseerde Misdaad (POCA) en die verkryging van opbrengste uit onwettige aktiwiteite.
“Sy aanklagte spruit uit die was van R920 000 uit sy prokureurstrustrekening wat hy na bewering na sy besigheidsrekening oorgedra het. Hy het dit glo as ”fooie” vermom.”
Alle beskuldigdes verskyn in hof
Al 72 beskuldigdes in hierdie saak verskyn môre om 09:00 in die landdroshof in Pretoria. Die saak sal na verwagting vir verdere ondersoek uitgestel word.
