*PERSVERKLARING
Die Demokratiese Alliansie (DA) sal ernstige kommer oor ‘n vlaag aanrandings by die nuwe geestesgesondheidshospitaal in Kimberley by die kantoor van die Gesondheidsombud aanmeld.
Dit volg nadat nege uit tien aangemelde voorvalle van aanranding veroorsaak is deur ‘n tekort aan voorraad van Clopazine, ‘n antipsigotiese middel wat gebruik word om geweld en aggressie by pasiënte wat aan skiso-affektiewe en bipolêre versteurings ly, te beheer. In sewe gevalle het pasiënte mekaar aangerand. In drie gevalle het pasiënte ook personeel aangerand.
Die Noord-Kaapse gesondheidsdepartement het in sy eerste kwartaalverslag vir 2023/2024 bevestig dat, van die 10 pasiëntveiligheidsvoorvalle wat ervaar is, nege as gevolg van nadelige geneesmiddelreaksies is. Dit is veroorsaak deur die oorskakeling in behandeling as gevolg van die afwesigheid van Clopazine.
Die DA se kommer oor personeel- en pasiëntveiligheid by die fasiliteit word vererger deur die gebrek aan mediese en sekuriteitspersoneel by die hospitaal.
Die departement het erken dat, op 8 Mei 2023, vyftien staatspasiënte van Korrektiewe Dienste oorgeplaas is nadat ‘n nuwe saal in werking gestel is sonder die aanstelling van bykomende personeel. Ons vermoed dat die personeeltekorte dalk ook ‘n bemagtigende rol in die aanrandings gespeel het.
Die departement moet redes verskaf vir die tekort aan Clopazine, wat van kritieke belang is vir behandeling in ‘n psigiatriese hospitaal. Ons het skriftelike vrae ingedien, insluitend of die departement deur regseise in die gesig gestaar word ten opsigte van die aanrandings. Hulle moet ook aandui of die personeel-tot-pasiënt-verhouding aan die riglyne vir geestesgesondheidsbehandeling voldoen. Ons wil verder weet of ‘n ondersoek geloods is en watter maatreëls geneem is om personeel- en pasiëntveiligheid te verbeter.
Die DA sal ook die inligting aan die Gesondheidsombud rapporteer, gegewe kommer dat dit deel vorm van ‘n groter patroon van geweld by gesondheidsfasiliteite. Dit volg op ‘n onlangse versoek deur Michele Clarke, die DA-skaduminister van gesondheid, aan die Gesondheidsombud om die voorval te ondersoek waar twee hospitaalsekuriteitswagte ‘n 13-jarige gestremde pasiënt in KwaZulu-Natal aangerand het, asook ‘n antwoord van die Nasionale Minister van Gesondheid, dr. Joe Phaahla, wat aandui dat voorvalle van aanranding in geestesgesondheidsfasiliteite en gewone gesondheidsfasiliteite landwyd toegeneem het.
Hospitale, veral geestesgesondheidsfasiliteite, behoort aggressiewe gedrag te verminder, nie te vererger deur onvoldoende geestesgesondheidsorg, pasiënttoesig en sekuriteit nie.
*PERSVERKLARING
Lees ook: Verdagtes in Nick Frischke-saak vandag weer in hof
