LEES OOK: Verdagte doodgeskiet wat man glo wou roof
Die Tshwane-nooddienstepersoneel moes aandag gee aan verskeie voorvalle ná gisteraand se storm wat sommige geboue en voertuie in verskeie dele van Pretoria beskadig het.
Huise is beskadig deur die sterk winde wat Dinsdagaand verwoesting in Tshwane gesaai het en dele van die stad sonder elektrisiteit gelaat het.
Charles Mabaso, woordvoerder van die Tshwane-noodbestuursdienste, het gesê bome is in Valhalla en Centurion ontwortel. “Drie plakkershutte is in Blok K in Soshanguve weggewaai. Rampbestuurslede is uitgestuur en mense het daarin geslaag om verblyf by hul bure te vind,” het hy gesê.
’n Huisdak is in Soshanguve-blok HH weggewaai. “Geen alternatiewe verblyf was nodig nie. Die gesin het daarin geslaag om hulself in ’n kamer te huisves wat nie beskadig is nie.”
Die storm het geen ernstige skade berokken nie, het Mabaso gesê. “Geen beserings of sterftes is by die inbelsentrum aangemeld nie.” Stad Johannesburg EMS-woordvoerder Robert Mulaudzi het ook gesê daar was geen berigte van beserings, skade of sterftes tydens die storm nie. Die SA Weerdiens het Dinsdag opgemerk dat die eerste lente-donderstorms in Gauteng voorgekom het. Daar word gesê dat die storms “sterk winde produseer, maar nie baie reën nie”.
Die volgende foto’s is op Find-It se Facebook-blad deur lesers gedeel:
#Gauteng #Storm #Tshwane #Pretoria
