‘n Roofverdagte het veelvuldige beserings opgedoen nadat hy Maandagmiddag deur studente en die gemeenskap in Grangetown, KZN, aangerand is.
‘n Gr. 8-leerling het ‘n ouer wat buite sy skool geparkeer was, genader om bystand te vra nadat ‘n verdagte hom met ‘n mes van sy skoolskoene en rugsak beroof het terwyl hy na sy koshuis in Mhlasini KZN gestap het.
Die man en lede van die gemeenskap het die rower agternagesit en aangekeer. Die slagoffer se besittings en die mes wat in die rooftog gebruik is, is glo in sy besit gevind. Die groep het die rower glo met stokke en bottels begin slaan.
’n Verbyganger wat die aanranding gesien het, het omstreeks 15:42 lede van Reaction Unit South Africa (Rusa) vir bystand gekontak. By aankoms het reaksiebeamptes ontdek dat die 23-jarige verdagte gebloei het van ‘n besering aan sy kop. Hy het ook beserings aan sy hande en bene opgedoen.
