‘n Man (30) is in hegtenis geneem na die liggaam van sy meisie, Mahlaku Malebo Rabalao, verbrand in ‘n motor in Midrand gevind is.
Kapt Mavela Masondo, polisiewoordvoerder, sê die 30-jarige verdagte is Vrydag 28 Julie in KwaZulu-Natal in hegtenis geneem na ‘n lasbrief vir sy inhegtenisneming uitgereik is.
Die polisie het op 7 Maart ‘n oproep ontvang oor ‘n brandende voertuig in Midrand. Met die polisie se aankoms op die toneel het hulle ‘n brandende Mercedes-Benz aangetref.
Nadat die vuur geblus is, is menslike oorskot voor in die motor gevind.
Die polisie het dadelik met ‘n ondersoek begin en die oorledene is geïdentifiseer.
