‘n Tiener (18) is in hegtenis geneem ná ‘n bakleiery by ‘n taverne in Mpumalanga, wat na bewering gelei het tot die noodlottige messteek van ‘n 33-jarige man by Elukwatini.
Die tiener sal na verwagting vandag in die Albert Luthuli-landdroshof verskyn op ‘n aanklag van moord.
Die noodlottige messteek het Woensdag omstreeks 02:00 plaasgevind, volgens polisiewoordvoerder in Mpumalanga, brig. Selvy Mohlala.
“Daar word berig dat die verdagte (die 18-jarige) en ‘n vrou wat vermoedelik sy vriendin is, na raming 42 jaar oud, by die genoemde taverne was toe die slagoffer die genoemde vroulike vriendin genader het. Daar word beweer dat daar toe ‘n gestoeiery tussen die verdagte en die slagoffer ontstaan het,” het Mohlala gesê.
“Volgens inligting het die verdagte na bewering ‘n mes getrek en die oorledene doodgesteek.”
Die polisie en mediese noodpersoneel is na die toneel ontbied.
“Met aankoms het hulle hom (die 33-jarige) gevind waar hy in ‘n plas bloed lê, en hy is ongelukkig deur die mediese praktisyns dood verklaar. ’n Moordsaak is aanhangig gemaak, en nadat ’n ondersoek gedoen is, is die verdagte in hegtenis geneem, asook vir moord aangekla,” het Mohlala gesê.
“Tydens sy arrestasie is beslag gelê op ‘n mes, wat vermoedelik tydens die voorval gebruik is, vir verdere ondersoek. Die motief vir die moord is in dié stadium onbekend.”
Die voortgesette ondersoek sal ook bepaal of die taverne-eienaar handel gedryf het binne vasgestelde besigheidsure.
Bronne: IOL, Ghanamma
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
