Zanton Basson (17) se begrafnis het Saterdag in Mitchells Plain plaasgevind nadat hy glo deur sy “vriend”, met ‘n mes gesteek is en gesterf het toe hy hom daarop gewys het dat hy ongeskik was met ‘n bejaarde persoon.
Basson was ‘n Junior Raadslid en het drome gehad om bendegeweld te beveg. Die twee tieners was nog nie lank vriende nie. Die vriend was na bewering ‘n rehabiliterende dwelmverslaafde.
Mede-leerlinge van Rocklands High het sy kis gedra.
Die voorval waartydens hy gesterf het, het ongeveer twee weke gelede plaasgevind toe Basson na bewering saam met die verdagte bank toe gestap het by Westgate Mall en hom aangespreek het oor hoe hy ‘n bejaarde persoon hanteer het. ‘n Argument het tussen die twee vriende uitgebreek, waarna die verdagte glo ‘n mes uitgepluk het en vir Basson in die bors gesteek het.
Basson is na Mitchells Plain Melomed-hospitaal toe gehaas waar hy gestabiliseer is en daarna na Gatesville Melomed oorgeplaas is, waar hy oorlede is.
Die verdagte is in hegtenis geneem en het in die Mitchells Plain-landdroshof verskyn waarna hy Pollsmoor-gevangenis toe gestuur is. Hy sal weer op 13 Desember in dieselfde hof verskyn wanneer dit verwag word dat Basson se familie ‘n protesaksie sal loods.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
