Volgens die provinsiale departement van maatskaplike ontwikkeling is die kind verlede Saterdag dood en is Sondag by sy Coffee Farm-huis in KwaNdengezi, wes van Durban, begrawe.
Die gemeenskap het Hendrietta Bogopane-Zulu, adjunk-minister van maatskaplike ontwikkeling, in kennis gestel van die begrafnis van die seun, wat serebraal gestremd was.
LUR Nonhlanhla Khoza het gesê die dood is nie by die betrokke owerhede aangemeld nie en geen sertifikaat is uitgereik nie.
“Gemeenskapslede het alarm gemaak by die adjunk-minister, wat haar aangespoor het om na die provinsie te reis en reëlings te tref dat die opgrawingsproses gedoen word,” het sy gesê. “Daar word beweer die seun is verlede Saterdag oorlede nadat hy drie dae lank siek was, maar hy het nooit mediese aandag ontvang nie. Die oorledene het by sy stiefma en pa gewoon.”
Khoza het gesê sy is bekommerd dat alhoewel die familie agtergekom het die kind se toestand het versleg, hulle glo nie mediese hulp gesoek het nie.
“Ons is seergemaak deur hierdie saak. Die kind was bekend aan die departement en het voorheen ’n toelae ontvang. Die kind is dikwels deur die plaaslike dienskantoor versorg. Ons sou verwag het dat die familie ons sou inlig oor sy situasie.”
Die vinnige begrafnis het kommer gewek, het sy gesê.
“Ons hoop dat sedert die liggaam opgegrawe is, ‘n nadoodse ondersoek gedoen sal word en lig gewerp sal word op wat tot die kind se dood gelei het.
“Geen persoon moet begrawe word sonder dat sy of haar heengaan by binnelandse sake geregistreer is nie. Ons is bly die kind sal ’n ordentlike begrafnis kry.”
Die liggaam is na die Pinetown-lykshuis geneem.
Bronne: Times LIVE, SABC
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
