As Matshela Koko, voormalige hoof van Eskom, skuldig bevind word, kan hy tot 15 jaar tronkstraf gevonnis word.
Die Ondersoekdirektoraat (OD) het Donderdag op agt verdagtes toegeslaan wat vermoedelik betrokke is by twyfelagtige transaksies by Eskom. Onder hulle was Koko, sy vrou, Mosima Koko, en sy twee stiefdogters, Koketso Aren en Thato Choma.
Thabo Mokwena, voormalige uitvoerende hoof van die SA Vereniging vir Plaaslike Regerings (Salga), is ook in hegtenis geneem,asook Eskom se projekdirekteur by Kusile, Frans Sithole; prokureur Johannes Coetzee en sakeman Watson Seswai.
Hulle staan tereg op aanklagte van onder meer bedrog, korrupsie en geldwassery, waarvan skuldigbevinding kan meebring dat hulle lank agter tralies deurbring.
Na ‘n marathon-hofsitting, wat tot in die nag gestrek het, is die beskuldigdes uiteindelik almal borgtog toegestaan.
Die staat het nie hul vrylating teengestaan nie, maar hy het die hof gevra om hoë borgbedrae van R100 000 vir Mosima Koko, Aren, Choma en Coetzee vas te stel, en tussen R300,000 en R500,000 vir die res.
Van die beskuldigdes het vir laer bedrae gevra. Die staat het spesifiek R500 000 borgtog vir Koko gevra. Koko het deur sy regspan gesê hy kan net R50 000 bekostig.
Uiteindelik is borgtog egter op R70 000 vasgestel vir Mosima Koko, Arem, Choma en Coetzee en R300 000 vir Koko, Mokwena, Sithole en Seswai.
Die saak keer op 23 Maart 2023 terug na die hof.
Bronne: Eyewitness News, Capsradio
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
