Ongeveer een uit elke sewe kinders het ‘n behandelbare geestesgesondheidstoestand, veral omdat die Covid-19-pandemie die las en stres wat baie kinders ondervind, verhoog het.
Volgens dr. Alicia Porter van die SA Vereniging van Psigiaters (Sasop), sal die meeste van hierdie kinders die las van hul geestesgesondheid tot volwassenheid dra sonder voldoende geestesgesondheidsorg.
“Vir een uit 10 tienersterftes in Suid-Afrika is selfdood die rede, daarom moet daar aandag aan die vroeë tekens van kinder- en tienerdepressie gegee word om lewens te red.
“Vyf-en-sewentig persent van mense wat aan selfdood sterf, wys hul voorneme aan vriende of familie.
“Om uit te kyk vir tekens van depressie kan dus ‘n lewe red.
Afknouery, selfbesering en alkohol- of dwelmmisbruik kan ook tot selfdood lei, selfs al toon die persoon nie duidelike tekens van depressie nie,” sê Porter.
Dit is belangrik vir ouers om op te let vir die volgende tekens:
- Verandering in slaappatrone
- Verandering in eetlus of gewig
- Praat of beweeg met ongewone spoed of stadigheid
- Moegheid of verlies aan energie
- Gevoelens van waardeloosheid, selfverwyt of skuld
- Gedagtes of praatjies van dood of selfdood
- Uiterste angs en opwinding
- Veranderinge in belangstelling in dinge wat hulle voorheen geniet het
- Voel kwaad, geïrriteerd of gefrustreerd
Ouers moet uitkyk vir tekens van depressie of selfdood by hul kinders sodat hulle so gou as moontlik hulp kan kry.
“Neem jou kind altyd ernstig op as hulle na jou toe kom oor depressie of tekens van depressie en veranderinge in hul bui en gedrag toon,” sê Porter.
Kontak onmiddellik ‘n geestesgesondheidskenner of die Suid-Afrikaanse Depressie- en Angsgroep (Sadag) om ondersteuning vir jou kind te kry.
As jy of iemand na aan jou selfdoodgedagtes het, kontak die Suicide Helpline by 0800 567 567.
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
