Die vermeende huurmoordenaar wat na bewering deur die man van ‘n Gautengse polisiebeampte gehuur is, sal vandag in die Daveyton-landdroshof verskyn.
Die 30-jarige man is suksesvol aangekeer deur ‘n gesamentlike polisiespan wat die Direktoraat vir Prioriteitsmisdaadondersoek (Hawks) se ernstige georganiseerde misdaadondersoek saam met Ekurhuleni-misdaadintelligensie sowel as die Johannesburgse metropolisie insluit.
Volgens die Valke se woordvoerder, lt.kol. Philani Nkwalase, was die verdagte op die punt om na Swaziland te vlug.
Konst. Ntombizodwa Prudence Masuku (34) was verbonde aan die Daveyton-SAPD. Sy was op 23 Junie saam met haar man op pad werk toe, toe sy doodgeskiet is.
“Hulle is na bewering deur twee taxi’s in Durantweg by Makgoba Village gepak en passasiers van albei taxi’s het na bewering die egpaar genader en verskeie skote op die polisiebeampte afgevuur terwyl haar man gehardloop het om skuiling te soek. Met sy terugkeer het hy na bewering opgemerk sy vrou se diensvuurwapen word vermis en het die saak by die polisie aangemeld,” het Nkwalase gesê.
Hy het gesê die man, Velu James Masuku (34), is later dieselfde dag vir die moord op sy vrou in hegtenis geneem.
Nkwalase het gesê die verdagte, wat Sondag in hegtenis geneem is, is opgemerk waar hy ‘n voertuig in Julesstraat in Malvern, Johannesburg, bestuur het wat ooreenstem met die beskrywing wat verskaf is.
Dit volg nadat ‘n wenk ontvang is dat ‘n verdagte die balans (van betaling) eis nadat hy ‘n polisiebeampte vermoor het. “Die 30-jarige is in hegtenis geneem en daar is ook op die voertuig beslag gelê. Deur verdere ondersoek het die polisie ook die vermoorde beampte se diensvuurwapen teruggekry. Haar man het in dieselfde hof verskyn en die saak is tot 18 Julie 2022 uitgestel, wanneer hy na verwagting saam met die vermeende huurmoordenaar sal verskyn,” het Nkwalase gesê.
Bronne; MSN, The Star, News365
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook: Ontbindende liggame van dubbele moordslagoffers naby N2-hoofweg gevind
