Die polisie in Limpopo het geregtelike doodsondersoeke geopen nadat twee doopkandidate in die Masethekodam onder die Maleboho-polisiëringsgebied in Limpopo verdrink het.
Provinsiale polisiewoordvoerder, luitenant-kolonel Mamphaswa Seabi, sê die twee is Sondag dood tydens ‘n doopseremonie wat deur ‘n pastoor in die dam gehou is.
“’n Pastoor was glo besig met die doopritueel in die genoemde dam toe vier mense wat gedoop sou word in die dam geval het. Een van hulle het daarin geslaag om uit te swem. Die ander, ‘n vrou, is gered en die oorblywende twee het verdrink,” het Seabi gesê.
“Die twee liggame is dieselfde dag, omstreeks 16:30, deur duikers van die SAPD se soek-en-reddingseenheid uitgehaal. Die oorledenes is geïdentifiseer as Elvis Ramakgaphola (21) en Michael Rampa (29) van die dorpie Mohodi Ga Manthata.”
Die polisie het gesê ‘n soortgelyke voorval van verdrinking het verlede week in die Mogolrivier in Lephalale plaasgevind, waar ‘n pastoor en ‘n kerklid tydens die doop verdrink het.
Intussen het die provinsiale kommissaris van polisie in Limpopo, luitenant-generaal Thembi Hadebe, die potensiële gevare wat met stilstaande water in die riviere en damme geassosieer word uitgelig, en gemeenskapslede gewaarsku oor die “onrusbarende situasie van verdrinkingsvoorvalle” wat in die provinsie plaasvind, veral tydens godsdienstige aktiwiteite.
“Lede van die gemeenskap word gemaan om versigtig te wees wanneer damme en riviere vir enige doel gebruik word, insluitend godsdienstige aktiwiteite,” het Hadebe gesê.
Twee sake van doodsondersoeke is geopen en die polisie se ondersoeke duur voort.
Bronne: IOL, MSN, Times LIVE
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook: Khayalethu Magadla | Familie hoop steeds om liggaam te vind
