Druk neem toe op die departement van onderwys om sy wapenbeleid by skole te hersien ná die skietery op ‘n onderwyser by ‘n skool.
Inga Hopewell Nzoboyi (24), ‘n student-onderwyser by Sekondêre Skool Riverdene in Nuweland-Wes noord van Durban, is Dinsdag geskiet en ernstig gewond.
Hy is volgens sy kollegas in ’n kritieke toestand hospitaal toe gehaas. Paramedici wat op die toneel was, het gesê hy het ‘n skietwond in die kop gehad.
Siphiwe Mpungose, hoofsekretaris van die Educators Union of SA, het Dinsdag aan die Daily News gesê die vakbond is moeg daarvoor om onderwysers te begrawe wat by skole vermoor is, terwyl hul vuurwapens in kluise in hul huise gehou word.
Mpungose het bygevoeg wat onderwysers die kwaadste maak, is dat senior onderwysbeamptes in bewaakte kantore werk, terwyl onderwysers nie toegelaat word om hulself met hul gelisensieerde vuurwapens te verdedig nie.
“Ons is in ’n oorlogsone. Onderwysers is in ‘Oekraïne’ met niemand om hulle te verdedig nie. Hul grondwetlike reg om hulself te verdedig, is weggeneem deur die regering, wat hulle nie kan verdedig nie. Ons doen ‘n beroep op alle onderwysers wat gewere het om hulle na skole te bring om hulself teen misdadigers te verdedig en die vakbond sal tot hul verdediging kom as die departement hulle aankla. Diegene wat nie vuurwapens het nie, moet vir hul lisensies gaan aansoek doen en dit koop,” het Mpungose gesê.
Hy het gesê volgens inligting van die skool het “boewe” die skoolterrein in ‘n swart Toyota Yaris-sedan betree en voor leerlinge losgebrand. Hy het bygevoeg sy vakbond eis dat die departement erken dat hulle versuim het om beide onderwysers en leerlinge by skole te beskerm.
Mpungose het gesê die departement moet volle verantwoordelikheid aanvaar vir die misdade, moorde en geweld by skole.
“Ons wil ons oproep herhaal dat onderwysers in misdaadgeteisterde gemeenskappe hulself moet beskerm eerder as om hulpelose slagoffers te wees. Die departement van onderwys het die bloed van onderwysers op sy hande. Die Mickey Mouse-operasie in ons skole behoort nou te eindig. Ons wil twee polisielede per skool hê, veral in gebiede soos KwaMashu, Inanda, Nuweland-Wes en Oos, en ander brandpunte,” het Mpungose gesê.
Sibusiso Malinga, president van die Nasionale Onderwysersunie, het die departement gewaarsku dat as dit aanhou misluk om onderwysers te beskerm, hulle gedwing sal word om hulself te verdedig met wat hulle ook al naby hulle sou vind, en bygevoeg die departement het gewys dit gee nie om vir onderwysers se lewens nie.
Die Nasionale Professionele Onderwysersorganisasie van SA (Naptosa) het gesê dit is nie die eerste keer dat ‘n opvoeder aangeval word terwyl hy aan diens is nie en dit sal ook nie die laaste wees nie.
Thirona Moodley, uitvoerende hoof van Naptosa in KwaZulu-Natal, het gesê onderwysers se oproepe vir verbeterde sekuriteit by skole het op dowe ore geval.
Volgens onderwysers was die aanval glo ‘n daad van wraak nadat die onderwyser die vorige week daarin geslaag het om boewe wat die skool binnegekom het en onderwysers van hul selfone en ander besittings beroof het, te ontwapen.
Luitenant-kolonel Nqobile Gwala, polisiewoordvoerder, sê die polisie in Nuweland-Oos ondersoek ‘n saak van poging tot moord nadat ‘n onderwyser geskiet en gewond is.
Muzi Mahlambi, woordvoerder van KZN Onderwys, het gesê: “As onderwysdepartement is ons ewe ontsteld oor wat aan die gebeur is en hoop dat die omvattende provinsiale strategie oor misdaad newevoordele sal hê in die hantering van die misdaad wat in ons skole gebeur.”
Bronne: IOL, MSN, Daily News
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook: Ram in Suid-Soedan ‘tronkstraf’ opgelê vir moord op vrou
