’n Jong lesbiese paar wat deur ’n hof in die suidelike Indiese deelstaat Kerala herenig is, het gesê hulle vrees steeds dreigemente van hul families.
Adhila Nassrin (22) het ‘n hofpetisie ingedien nadat sy beweer het haar lewensmaat is deur haar familie ontvoer.
Die hof het Maandag beslis dat me Nassrin en haar lewensmaat me Fathima Noora (23) vry is om saam te woon.
Die paar het gesê hulle is “ekstaties” oor die bevel, maar dat hulle steeds nie “heeltemal vry” is nie.
Lede van die LGBT-gemeenskap het steeds grootliks met vooroordeel en vyandigheid in Indië te doen ondanks ‘n landmerk-hofbevel wat gay seks in 2018 gedekriminaliseer het.
Me Nassrin en me Noora het aan plaaslike media gesê dat hulle ontmoet en verlief geraak het terwyl hulle in Saoedi-Arabië gestudeer het.
Alhoewel hulle al etlike jare saam was, het hulle eers verlede maand hul families van hul verhouding vertel.
“Ons het al die jare versmoor gevoel by ons huise,” het me Noora Dinsdag aan ‘n nuuskanaal gesê.
Die paar het gesê hulle het sterk teenkanting van hul families ondervind nadat hulle hul verhouding bekend gemaak het.
Hulle het toe geskuil by Vanaja Collective, ‘n skuiling vir LGBTQ-mense en ander gemarginaliseerde gemeenskappe, in die Kozhikode-distrik in die noorde van Kerala.
Hulle het ingestem om me Nassrin se ouers terug huis toe te vergesel nadat hulle belowe is dat hulle geen kwaad aangedoen sou word nie, het die egpaar gesê.
Maar ‘n paar dae later, beweer hulle, het me Noora se familie haar met geweld weggeneem.
Me Nassrin het toe ‘n klag by die polisie ingedien en die hof genader en toestemming gevra dat die twee vroue saamwoon.
Me Noora het Dinsdag in die hof verskyn en gesê sy wil by haar lewensmaat wees. Volgens berigte het die hof binne minute in hul guns beslis.
Bronne: BBC, Yahoo
Lees ook: Fetus van babaseuntjie gevind by ‘n onwettige stortingsterrein
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
