Oscar Pistorius bly by ‘n fasiliteit in Gqeberha terwyl die departement van korrektiewe dienste voorberei vir sy slagoffer/oortreder-dialoog met die oog op sy moontlike paroolverhoor.
Singabakho Nxumalo, woordvoerder van korrektiewe dienste, het aan die uitsaaier Newzroom Afrika gesê Pistorius gaan nog vir June en Barry Steenkamp, die ouers van die vermoorde Reeva Steenkamp, ontmoet.
“Hy was sedert, dink ek, Desember verlede jaar in Gqeberha, spesifiek vir die doeleindes van die slagoffer/oortreder-dialoog. Daar is wat ons ‘n voorbereidende fase noem. Jy wil nie die twee groepe formeel laat saam kom wanneer jy nie met hulle in gesprek was en toets of hulle gereed is vir so ’n samekoms nie,” het Nxumalo gesê.
“Ons is steeds daarmee besig. Ons vergader met die familie van Reeva Steenkamp en daardie voorbereidings vind plaas. Daar was ‘n hele aantal geleenthede. Die oomblik wat alle partye gereed is, sal daardie samekoms plaasvind, maar ons kan nie ‘n risiko neem en die twee (partye) bymekaar sit wanneer een of albei van hulle nie gereed is nie.”
Nxumalo het gesê die proses is “baie sensitief en dit moet baie versigtig bestuur word”.
Verlede jaar het Independent Media berig Pistorius is na ‘n tronk in Gqeberha in die Oos-Kaap geskuif, met die doel om die Steenkamps te ontmoet.
Die oogmerk was dat die partye met mekaar sou praat as deel van Pistorius se komende paroolverhoor.
In ‘n onderhoud met Good Morning Britain verlede jaar het die ouers van Reeva Steenkamp gesê hulle wil die waarheid hê oor wat werklik gebeur het die dag toe Reeva vermoor is.
Hulle het gesê Pistorius moet betaal vir wat hy gedoen het. Die Steenkamps het onthul die verlies het mettertyd moeiliker geword.
“Ek sal graag eendag met Oscar wil praat, man-tot-man. Ons voel daar is nog baie dinge om uit hierdie storie te kom en ons hoop dat Oscar ons die waarheid sal vertel,” het Reeva se pa, Barry Steenkamp, gesê.
Hy het verduidelik dat hy die een is wat “indien moontlik” met Oscar wou gesels.
Toe hy gevra is of hulle dink Pistorius voel jammer oor wat hy gedoen het, het hy gesê dit is ‘n moeilike vraag om te beantwoord.
June Steenkamp het gesê hy het geen berou getoon nie. “Ek dink hy sal net berou toon as dit daartoe bydra dat hy uit die tronk kom. Ons het nie die volle storie nie. Hy het drie keer onder eed van plan verander”, het sy gesê en bygevoeg dat al wat hulle wil hê, die waarheid is.
June het gesê ‘n verskoning is nie genoeg nie. Sy het daarop aangedring dat die atleet sy volle 13 jaar vonnis moet uitdien.
Bronne: Daily News, IOL
Volg FiND iT hier.
Lees ook: Will Smith ‘sien’ voor Oscars-klap hy gaan sy loopbaan verloor
