‘n Senior amptenaar in die Nasionale Tesourie, Mampho Modise, het gesê R1 miljard is reeds bewillig om die nagevolge van die vloede in KZN te hanteer.
Die tesourie het aangedui dat daar geen behoefte is aan ‘n spesiale toewysingswetsontwerp vir die vloede in die provinsie nie.
Fondse is deur verskeie regeringstelsels aan die provinsie toegeken. Modise het Dinsdag 3 Mei met die staande komitee oor bewilligings gepraat.
Sy het verder verduidelik dat daar geen ander fondse bewillig is om die gevolge van die KZN-vloede in die loop van 2022 te hanteer nie.
Meer as 430 mense het in KZN weens die vloede gesterf en ‘n enorme bedrag geld is nodig om paaie, brûe, huise, beskadigde besighede en infrastruktuur reg te maak en te herbou.
President Cyril Ramaphosa het onlangs aangekondig dat daar talle hulpbronne en meer fondse na die vloede in KwaZulu-Natal herlei sal word.
Die parlement het ‘n spesiale komitee saamgestel om toesig te hou oor die gebruik van fondse in KZN.
Modise het aan LP’s verduidelik dat die begroting wat vanjaar toegeken is, die kwessie van vloede in ag neem. Sy het bygevoeg dat die Wet op Rampbestuur vir rampe opgestel is.
“Die begroting in sy huidige vorm neem die vloede in ag. Ons het die Wet op Rampbestuur wat vir rampe opgestel is. Toe KZN ‘n ramp beleef het, was dit nie ‘n skok vir die stelsel nie, dit was nie iets wat ons nie kan hanteer nie. Ons het nou al geruime tyd met rampe te doen,” het Modise gesê.
Bronne: MSN, YouTube, The South African
Volg FiND iT hier.
Lees ook: 75 mense beseer in KZN bus ongeluk
