‘n Voormalige polisiebeampte van Philadelphia is van moord aangekla omdat hy ‘n 12-jarige seun tydens ‘n chaotiese jaagtog te voet vroeg in Maart in die rug geskiet het.
Owerhede sê dat Edsaul Mendoza (26) betrokke was by ‘n “takties ongesonde” agtervolging van Thomas “TJ” Siderio en hom geskiet het ondanks die wete dat hy ongewapen was. Die polisie het geglo ‘n vriend van hom was betrokke by die diefstal van ‘n wapen.
Volgens ‘n aanbieding van feite wat deur Philadelphia se distriksprokureur vrygestel is, was Mendoza deel van ‘n groep van vier burgerlike beamptes wat Thomas en ‘n 17-jarige vriend – wat in hofstukke as “NK” geïdentifiseer is – op 1 Maart gekonfronteer het.
Die beamptes het geglo NK is “verbind” met ‘n gesteelde vuurwapenondersoek.
Toe hulle probeer het om die seuns te stop, “het ‘n skoot afgegaan” en ‘n agterste passasiersruit gebreek, volgens die aanbieding.
Toe die seuns probeer vlug, het Mendoza vir Thomas agternagesit en drie keer op hom geskiet.
Die derde skoot, volgens die dokument, het plaasgevind, al het Mendoza geweet dat Thomas se wapen sowat 40 voet (12 m) ver weggegooi is. Thomas het opgehou hardloop toe die laaste skoot afgevuur is.
“Toe Mendoza dus die derde en noodlottige skoot afgevuur het, het hy geweet die 12-jarige, vyf voet lange, 111 pond Thomas Siderio het nie meer ‘n geweer nie en geen vermoë om hom skade aan te doen nie,” het Larry Krasner, distriksprokureur van Philadelphia Maandag aan verslaggewers gesê. “Maar hy het nietemin ‘n skoot in sy rug afgevuur en hom doodgemaak.”
Mendoza is kort ná die voorval deur die polisiemag afgedank, met die polisiekommissaris wat destyds gesê het die departement se beleid oor die gebruik van mag is oortree.
Mendoza is Sondag in hegtenis geneem en word sonder borgtog aangehou. ’n Voorverhoor is vir 16 Mei vasgestel.
Bronne: NBC News, BBC
Volg FiND iT hier.
Lees ook: Uitjouery vir President Cyril Ramaphosa tydens Werkersdag-saamtrek ontbloot krake in alliansie
