Old Mutual verplig al sy werknemers in Suid-Afrika om teen Covid-19 ingeënt te word.
“Inentings blyk die sleutel te wees om ekonomiese aktiwiteit te ontsluit, die lewe na ‘n meer normale ritme terug te bring, ernstige siektes en dood te voorkom, oordragtempo’s te verlaag, sowel as om die opkoms van nuwe variante van die siekte te verminder,” sê die hoof uitvoerende beampte, Iain Williamson, in ‘n e-posverklaring.
Die beleid sal vanaf Januarie in werking tree en daar sal van personeellede vereis word om ‘n bewys van hul inentingstatus by die versekeringsmaatskappy in te dien.
Adjunk-president David Mabuza het intussen kommer uitgespreek dat die land kan misluk om byna 40 miljoen burgers teen die einde van 2021 ingeënt te hê, aangesien Suid-Afrika jaag om kudde-immuniteit te bereik.
“Ek is nie seker of ons die 70% waarna ons smag, gaan haal nie. Dit lyk vergesog. Ons sal tien teen een ons teikens moet hersien,” het hy Vrydag erken.
Volgens die jongste statistieke het Suid-Afrika die Covid-19-entstof aan meer as 13 miljoen of 33,21% van die volwasse bevolking versprei uit die 39 798 201 of 70% wat die regering wil bereik.
“Dit is baie duidelik dat ons slegs ‘n paar weke oor het. Op die oomblik is ons rondom 40% en 70% is ‘n baie hoë mikpunt om te bereik.”
Tydens die sosiale mobiliseringveldtog vir inentings in Gqeberha, in die Oos-Kaap, het die adjunk-president weereens sy stem gebruik om mense aan te moedig om die lewensreddende entstof te neem, aangesien ‘n aantal Suid-Afrikaners weier om ingeënt te word.
Adjunk-president Mabuza het gesê burgers moet hul naaste inentingssentra besoek. “Ent in om jou vriende, families en die welvaart van ons land te beskerm,” het hy burgers aangemoedig.
Volgens die adjunk-president behoort die bereiking van bevolkingsimmuniteit almal se grootste motivering te wees om te verseker lewens word gered.
“Ons moet die moontlike vierde golf vermy wat dodelik kan wees vir al die mense wat nie ingeënt is nie,” het hy beklemtoon en bygevoeg die land het genoeg entstof ontvang om al die volwassenes in te ent.
“Daar is geen rede om weg te bly nie aangesien inentingsdae verleng is om te verseker dat ons almal toegang daartoe het.”
Sodra kudde-immuniteit bereik is, het die adjunk-president gesê, is dit moontlik om die ekonomie ten volle oop te maak en te verseker dat mense se lewensbestaan verseker word.
