POTCHEFSTROOM. – Otsile Juell Boinamo (31), ’n vermeende verkragter, het homself Maandag aan die Itsoseng-polisie oorhandig nadat hy glo ’n vrou in ’n rolstoel verkrag het.
Kol. Adéle Myburgh, polisiewoordvoerder, sê na bewering het ’n 30-jarige vrou in ’n rolstoel, by vriende gekuier en later na ’n taverne op Vrydag, 22 Oktober 2021 in die Bodibe-dorpie naby Itsoseng gegaan.
“Die vrou was omstreeks 19:00 op die punt om die taverne te verlaat toe Boinamo vrywillig aangebied het om haar huis toe te neem. Op pad het die beskuldigde haar egter eerder na sy plek in Sone 1 geneem, waar hy haar glo verkrag het.”
Die slagoffer het op Saterdag, 23 Oktober 2021 daarin geslaag om te ontsnap deur uit die huis in die straat te kruip. ’n Verbyganger het haar bygestaan en die polisie gekontak. Gevolglik is ’n saak van verkragting vir ondersoek geopen.
Boinamo het op Woensdag 27 Oktober in die Itsoseng-landdroshof verskyn en sal weer op 4 November sy twee verskyning maak wanner hy om borg aansoek sal doen.
LEES OOK: Student ontvoer, beroof
