September 20, 2021

Die mooiste sprokies van Grimm

Die topverkoperskrywer Marita van der Vyver het van die wêreld se bekendste en mees geliefde sprokies direk uit Duits vertaal en bied ’n opwindende nuwe perspektief op die verhale. Die internasionaal bekroonde illustreerder Piet Grobler se kunswerke verleen ’n magiese element aan die stories wat dit op ’n besondere wyse komplimenteer. Van der Vyver skryf oor Grobler se onweerstaanbare illustrasies: “Ek het geweet Piet sou die uitdaging aangryp om die oorbekende stories op ’n vars en unieke manier uit te beeld.”

Die teks op die agterblad lui: “Hier is bekendes soos Rooikappie, Die wolf en die sewe bokkies, Die musikante van Bremen, Klein Duimpie, Die Paddaprins, Raponsie en Sneeuwitjie, asook minder bekende sprokies soos Die ganswagtertjie, Beervel, Die goue voël en Ysterhans.”

Van der Vyver skryf in die voorwoord: “Hierdie boek is ’n persoonlike keur van my eie gunstelinge onder die broers Grimm se sprokies – die bekendes, natuurlik, maar ook die minder bekendes en selfs die onbekendes – wat ek graag aan ’n nuwe geslag ouers en kinders wil voorstel. Ek het elkeen weer ’n slag afgestof en deeglik gepoets, maar altyd getrou probeer bly aan die oorspronklike weergawe. En wees gerus, die oorspronklike sprokies was nie noodwendig vir kinders bestem nie; dit was volksvermaak vir alle ouderdomme, amper soos die gewildste TV-sepies deesdae. Die humor, die stuitigheid en veral die wreedaardighede kan nog ’n openbaring wees vir dié van ons wat met soetsappige oorvertellings en Walt Disney se silwerdoekweergawes van die sprokies grootgeword het.”

Human & Rousseau Uitgewers publiseer Die mooiste sprokies van Grimm (die tweede uitgawe). Hierdie pragbundel van 272 bladsye, ’n herdruk in sagteband, hoort op elke gesin se boekrak. Dit word aanbeveel vir kinders ses tot nege jaar oud, maar sal jonk en oud bekoor.

Kry jou kopie hier.

Leave a Reply

Your email address will not be published. Required fields are marked *