Hospitaal vermors glo lewensnoodsaaklike Covid-19-toerusting

Al die foto’s oor die bogenoemde, is gister deur die VF Plus self geneem.

Hospitaal vermors glo lewensnoodsaaklike Covid-19-toerusting

Hospitaal vermors glo lewensnoodsaaklike Covid-19-toerusting Foto: Verskaf

“Die VF Plus het gister met ’n oorsigbesoek aan die Kopanong-hospitaal in Vereeniging afgekom op skokkende bewyse van die vermorsing van lewensnoodsaaklike Covid-19-toerusting wat waarskynlik honderde miljoene rand beloop,” sê Philip van Staden, VF Plus-LP en hoofwoordvoerder van gesondheid.

Die parlement se portefeuljekomitee vir gesondheid doen tans oorsigbesoek by alle hospitale regdeur die land.

LEES OOK: Sekstorsie en kubermisdaad op jou foon – Mike Bolhuis gee raad

Mediese afval word nie verwyder nie

“Ewe ontstellend was groot hoeveelhede onverwyderde mediese afval wat glo met die Covid-19-virus gekontamineer is wat by die hospitaal ophoop, aangesien die kontrakteur wat die verwydering doen, glo nie betaal word nie en aan wie sowat R16 miljoen verskuldig is.”

Geboue wat opgerig moes word vir die behandeling van Covid-19-pasiënte staan half-gebou en verlate met geen teken dat daar nog enige werk gedoen word nie.

 Al die foto’s oor die bogenoemde is gister deur die VF Plus self geneem.

Verlede jaar al ontvang

“Personeel het aan die VF Plus gesê die groot hoeveelhede nuwe toerusting en beskermende toerusting is verlede jaar reeds ontvang om gereed te maak vir die eerste vlaag Covid-19. Dit lê ongebruik en verlate in ‘n groot saal by die hospitaal terwyl Suid-Afrika nou reeds sy derde golf van Covid-19 binnegaan.”

Dit is bekend dat gesondheidspersoneel gebuk gegaan het onder groot tekorte van veral beskermende toerusting en dat baie in alle waarskynlikheid hul lewe ingeboet het weens ‘n tekort aan dié toerusting.

“Baie Suid-Afrikaners wat gered kon word, het waarskynlik ook gesterf vanweë ‘n tekort aan toerusting wat hier bloot in groot hoeveelhede opgehoop en totaal vermors staan.”

Situasie oral dieselfde

Oor die lewensbedreigende mediese afval wat oop en bloot staan en ophoop, is op navraag aan die VF Plus gesê die situasie is dieselfde by baie provinsiale hospitale in Gauteng.

“Daar is geen twyfel nie dat die situasie ‘n ernstige gesondheidskrisis skep en indien dit wel dieselfde is by ander hospitale, moet daar onmiddellik opgetree word om alternatiewe maatreëls te tref om die afval te laat verwyder.

 “Die Gautengse departement van gesondheid sal antwoorde moet verskaf oor die ongebruikte toerusting en die nie-betaling van die kontrakteurs om die mediese afval te verwyder.

 “VF Plus hou ook die nasionale departement van gesondheid verantwoordelik hiervoor, aangesien die nasionale departement veronderstel is om ook ‘n oorsigrol oor die nege provinsies uit te voer.”

LEES OOK: Verdagtes op vrye voet na moord op familie

Leave a Reply

Your email address will not be published. Required fields are marked *