ST. HELENABAAI, WES-KAAP. – Die vyfster- Shelley Point-hotel en spa op St. Helenabaai het net voor 7:00 vanoggend vlamgevat. Die brand is vir ‘n kort ruk onder beheer gebring en ontruimings kon plaasvind.
Brandbestryders van omliggende areas moes help om die vlamme te beveg. Geen beserings is aangemeld nie.
Volgens Basil January, brandweerhoof van Saldhanabaai, het sommige mense rook ingeasem, maar hulle is daarvoor behandel. Hy sê die oorsaak van die brand is nog nie bepaal nie, maar omstanders meen dat dit moontlik in die kombuis begin het.
‘n Volledige ondersoek sal eers gedoen kan word sodra die brand ten volle geblus is. Andrè Truter, uitvoerende burgemeester, sê daar word nou gekeer dat die brand nie na die omliggende huise versprei nie.
Na bewering is daar in November opknappingswerk aan die hotel en spa gedoen. Sonpanele is ook aangebring.
Die Strandloper-restaurant op Langebaan het ook Maandag betyds gekeer dat die restaurant vlamvat nadat ‘n brand daar naby uitgebreek het.
