LEES OOK: Meer spesiale kwytskelding kom om oorbevolking in tronke te verminder
Sowat 640 werknemers van die departement van justisie en grondwetlike ontwikkeling het gedurende die 2022/2023-boekjaar bedank in wat die ANC-LP se Qubudile Dyantyi ‘n kommerwekkende “uittog” genoem het. Die departement het Woensdag die jaarverslag aan die portefeuljekomitee oor justisie en korrektiewe dienste voorgelê.
Oor die “tekort aan menslike kapasiteit” waarna in die verslag verwys word, het Dyantyi opgemerk: “Die probleem wat die departmenet het, is dat daar ‘n stormloop is. Daar is ‘n uittog van mense wat die departement in massas verlaat.” Hy het opgemerk dat die probleem nie verbeter nie, want in die vorige jaar het 486 persone die departement verlaat en die jaar voor dit was dit 420. “Dit lyk of mense ‘n besluit geneem het. Hulle het besluit dit is nie ‘n departement van hulle keuse nie – dié wat binne is gaan letterlik weg. So dit is vir my baie ernstig,” het Dyantyi uitgewys.
Die departement se direkteur-generaal, Doc Mashabane, het geantwoord dat hy kan sien hoekom “iemand sal dink mense hardloop weg”, maar die 600 persone wat bedank het, “vlug nie weg van die staatsdiens nie, hulle neem slegs geleenthede iewers anders.” Volgens Mashabane het senior bestuurders die departement net verlaat in “uitsonderlike omstandighede wanneer mense bevordering na ander departemente kry.”
Die adjunk-direkteur-generaal, Conny Mametja, het aan die parlementslede verduidelik dat sommige werknemers bedank het vir “groener weivelde”, terwyl ander bedank het om toegang tot hul pensioene te kry, en toe later teruggekeer het na die departement. Sy het aangedui: “Ons fokus regtig daarop om die departement as ‘n voorkeurwerkgewer te bou.”
#Department #Regering #Bedankings #Afrikaans #Nuus
Bronne gebruik: South Africa Labour News; News24.
