LEES OOK: KYK: Sewejarige beskerm jonger boetie vir 36 uur onder puin na aardbewing
Pathisane Khumalo (28) is ‘n boete van R1 miljoen of vyf jaar gevangennisstraf opgelê vir die smokkel van onwettige sigarette.
Kapt. Matimba Maluleke, polisiewoordvoerder, sê die provinsiale hoof van die direktoraat vir prioriteitsmisdaadondersoek in die Limpopo-provinsie, generaal-majoor Gopz Govender, verwelkom die boete.
“Gedurende September 2022 het Limpopo-snelwegpatrollielede ‘n verdagte Isuzu-vragmotor opgemerk wat op die N1 naby Botlokwa ry en dit is gestop. Die vragmotor, met twee insittendes, is deursoek en bokse met onwettige sigarette (Remington Gold) ter waarde van R1 786 685,03 is gevind en op beslag gelê,” sê Maluleke.
Die vragmotorbestuurder, Khumalo en die passasier, Victor Sithole (25) is in hegtenis geneem en lede van die Valke se ernstige kommersiële misdaadondersoekspan is na die toneel ontbied om die ondersoek oor te neem. Soos die ondersoek gevorder het, is vasgestel dat die besendings vir Gauteng bestem was.
“Beskuldigde nommer een, Khumalo is aangekla vir die oortreding van die Doeane- en Aksynswet 92 van 1964 (smokkel van onwettige sigarette) terwyl beskuldigde nommer twee, Sithole, aangekla is vir die oortreding van die Immigrasiewet. Die beskuldigdes is in polisie-aanhouding gehou, aangesien hul borgtog suksesvol teëgestaan is totdat hulle skuldig gepleit en op 8 Februarie 2023 gevonnis is.”
Afgesien van ‘n boete van R1 miljoen, is Khumalo ook onbevoeg verklaar om ‘n vuurwapen te besit terwyl Sithole ‘n boete van R5 000 of twee jaar tronkstraf opgelê is.
