‘n Menslike skelet is Woensdag tussen oorgroeide planteinp Geminiweg in die Everest Heights-gebied van Verulam in KwaZulu-Natal gevind.
Volgens Reaction Unit South Africa (Rusa) se woordvoerder, Prem Balram, is lede van die eenheid om 11:30 na die toneel uitgeroep nadat ‘n verbyganger die ontdekking gemaak het.
“By hul aankoms is reaksiebeamptes ongeveer 20 meter van die pad af gelei tot in oorgroeide plantegroei waar die skelet, geklee in ‘n verbleikte grysblou broek, gelê het,” het hy gesê.
Balram het gesê ‘n rooi T-hemp en ‘n humerus (bo-armbeen) is byna ‘n meter verder gevind. Die voetbene is nie opgespoor nie.
“Daar word geglo dat honde van die buurt die beendere van die toneel verwyder het, maar dit kon nie bevestig word nie,” het Balram gesê.
Hy het bygevoeg dat die ras en geslag van die oorledene nie bepaal kon word nie. Die oorskot sou aan die Verulam-SAPD oorhandig word vir verdere ondersoek.
Konst. Thenjiswa Ngcobo, provinsiale polisiewoordvoerder, het die voorval bevestig.
“Die polisie in Verulam het ‘n geregtelike doodsondersoek geopen na die herwinning van skeletoorskot in Geminiweg by Everest Heights in Verulam,” het sy gesê.
Bronne: Daily News, VN Explorer
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
Lees ook: Fase 6-beurtkrag duur voort tot verdere kennisgewing
