Die hofsaak teen die twee beskuldigdes wat teregstaan op aanklagte van die moord op Chevonne Rusch (2) van Germiston is uitgestel.
Die saak, wat op 13 September in die Germiston-landdroshof aangehoor is, is tot 6 November uitgestel om verdere ondersoek deur die staat moontlik te maak.
Rochelle Botha, ma van die tweejarige meisie, het haar derde verskyning gemaak terwyl Cornelius Stefan van Niekerk sy vierde verskyning gemaak het.
Die beskuldigdes het saam in die beskuldigdebank van die D-hof in die Germiston-landdroshof verskyn.
Van Niekerk staan tereg op aanklagte van moord terwyl Botha teregstaan op aanklagte van moord op ‘n minderjarige, aanranding met die doel om ernstig te beseer en verkragting van ‘n minderjarige.
Voordat die saak uitgestel is, het Botha se regsverteenwoordiger die hof ingelig dat sy haar borgtogaansoek voorlopig laat vaar het.
In die lig hiervan het die aanklaer versoek dat die saak teruggestel word om verdere ondersoek moontlik te maak.
Dit het verder die hof ingelig dat die saak na die hooggeregshof sal voortgaan. Inligting wat volgens die aanklaer nog uitstaande is, sluit in die nadoodse ondersoekverslag, DNS-uitslae van die oorledene asook twee ander minderjarige kinders, en inligting van die beskuldigdes se selfone.
Die landdros het Botha en Van Niekerk meegedeel dat sodra ondersoeke afgehandel is, ‘n klagstaat deur die direkteur van openbare vervolging voorberei sal word.
Hoewel Botha en Van Niekerk hul borgtogaansoeke voorlopig laat vaar het, het die landdros hulle daaraan herinner dat hulle die reg behou om om borgtogaansoeke aansoek te doen. Van Niekerk en Botha sal ná die uitstel in aanhouding bly.
In Mei is berig dat ‘n saak van moord geopen is nadat die oorlede kind na Wannenburg-kliniek in Primrose geneem is.
SAPD-woordvoerder sers. Lillian Modiga Primrose en polisiebeamptes is kort ná 13:00 op 11 Mei na die kliniek ontbied.
“Toe beamptes opdaag, het verpleegsters vir hulle ‘n kind gewys wat ingebring is deur ‘n man wat glo die kind se stiefpa is.
“Die kind was in ‘n kombers toegedraai en het bloed in haar mond en kneusplekke oor haar hele lyf gehad. Sy het ook ’n wond aan die agterkant van haar kop gehad,” het sy gesê.
Modiga het gesê weens die beserings is ‘n moorddossier geopen.
