Dit is “Shark Week” in die Verenigde State. Terwyl die Discovery-netwerk naby Mosselbaai, in die Wes-Kaap, verfilm het, het hommeltuig-beeldmateriaal van drie orkas, oftewel moordwalvisse, wat ‘n withaai doodmaak, vasgevang.
Die beeldmateriaal ondersteun wetenskaplikes se teorieë oor haaimigrasie. Volgens die Daily Beast is dit die eerste keer dat ‘n voorval soos hierdie op kamera vasgevang is ná drie dekades van Shark Week-programme.
Alison Towner, ‘n Suid-Afrika-gebaseerde wetenskaplike wat die bewegingsekologie van witdoodhaaie bestudeer, het aan die publikasie gesê die beeldmateriaal is geskiedkundig en beskryf dit as “een van die mooiste stukke natuurgeskiedenis wat ooit verfilm is.”
Die beeldmateriaal wys twee orkas wat in Mosselbaai se water swem voordat ‘n derde uit die diepte opstyg met ‘n haai van nege voet (2,7 meter) in sy bek.
Bloed is in die water te sien soos die orka die oppervlak bereik.
Towner het gesê daar is bewyse wat daarop dui dat orkas verantwoordelik is vir die doodmaak van witdoodhaaie, want karkasse van die diere het aan wal gespoel met hul lewers of harte vermis.
Die beeldmateriaal is egter die eerste direkte bewys van die predasie.
Towner het onlangs ‘n artikel in die African Journal of Marine Science gepubliseer waarin uiteengesit word hoe orkas wat witdoodhaaie jag, verantwoordelik was vir ‘n groot migrasie van haaie uit gebiede waarin hulle eens gefloreer het.
Bronne: MSN, The South African, NY Post
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus. As jy Afrikaanse Nuus op die Moya App wil lees, volg die skakel.
Lees ook: Maak reg vir nog sneeu die week
