Die stigter en leier van In His Presence Ministries in Limpopo, pastoor Walter Mashalane, is tot vyf jaar tronkstraf gevonnis vir diefstal van vuurwapens, die besit van ongelisensieerde vuurwapens en ammunisie.
Die vonnis is op Vrydag 15 Julie 2022 deur die Senwabarwana-streekhof in Limpopo opgelê.
Die hof het bevind die 46-jarige het een van sy gemeentelede genader en versoek dat sy twee vuurwapens wat aan haar man behoort het, saambring met die doel dat daar vir hulle gebid word omdat haar man gesê het hy het in 2019 negatiewe voorgevoelens daaroor gehad.
Die vrou het gehoor gegee en die twee vuurwapens sonder die wettige eienaar se medewete aan pastoor Mashalane oorhandig.
Daarna het die wettige eienaar die pastoor genader en hom gevra om die wapens terug te gee, maar hy het geweier.
Volgens die polisie is ‘n saak van diefstal van vuurwapens daarna geopen en is later na die provinsiale speurders vir ondersoek oorgeplaas.
Die pastoor is op 10 September 2019 by die dorpie Mokhurumela aangekeer.
Limpopo-polisiewoordvoerder, brig.Motlafelo Mojapelo, het gesê tydens die arrestasie het die polisie ná ‘n deeglike ondersoek in die huis een vuurwapen met ammunisie wat binne-in ‘n plafon versteek was, gevind.
“Die ander vuurwapen is nooit teruggevind nie. Die beskuldigde is later gratis borgtog met ‘n waarskuwing toegestaan tot sy vyf jaar gevangenisstraf op genoemde dag en ook onbevoeg verklaar om ‘n vuurwapen te besit,” het Mojapelo gesê.
Lt.genl.Thembi Hadebe, polisiekommissaris van Limpopo, het gesê die aanhouding van pastoor Mashalane moet as afskrikmiddel vir ander pastore dien dat niemand verhewe is bo die wet nie.
“Pastore is veronderstel om geestelike leiding aan die samelewing te verskaf, nie om by kriminele aktiwiteite betrokke te wees nie,” het Hadebe gesê.
Bronne: MSN, The South African, Flipboard
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook: Bejaarde vrou deur alligators gedood toe sy in buiteklub se dam val
