Eskom het berigte bevestig ‘n brand het Maandagoggend by die Duvha-kragstasie, 15 km oos van eMalahleni in Mpumalanga, uitgebreek.
Eskom het in ‘n verklaring gesê die brand het in Eenheid 2 by die Duvha-kragstasie uitgebreek, maar “is vinnig geblus” en hulle “ondersoek die grondoorsaak van die brand, omvang van die skade en moontlike terugkeer na diens”.
Die brand volg op verskeie voorvalle van wat Eskom-amptenare gedurende Mei as sabotasie beskryf het.
Op 19 Mei is ‘n kragkabel wat na ‘n klep by Tutuka-kragstasie se Eenheid 5 lei, afgesny. Amptenare het op dieselfde dag bevestig ‘n lugpyplyn is ook afgesny. Die volgende dag is kabels by die Hendrina-kragstasie geknip en gesteel. Op 21 en 22 Mei is ‘n kabel op Eenheid 1 by Matla-kragstasie geknip.
Plaaslike nuusdienste het vroeër die dag berig oor amptelike ontkennings en pogings om die brand as onbelangrik af te maak.
Lenny Maseko, ’n woordvoerder van Duvha, het glo aan Middelburg Observer gesê daar was ’n oliestorting. “Gelukkig was daar geen brand nie … die voorval is nietemin ernstig,” het Maseko aan die koerant gesê en bygevoeg dat alle eenhede by Duvha operasioneel gebly het.
Bronne: Daily Maverick, MSN, News24
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook: Sewe rowers breek in by Gateway-winkelsentrum, steel Playstations
