’n KwaZulu-Natalse onderwyserassistent wat die moord op sy skoolhoof beplan het omdat hy gevoel het hy word by sy skool geminag, is vir 25 jaar tronk toe gestuur.
Sibonelo Sikhakhane (30) is vandeesweek in die hooggeregshof in Pietermaritzburg skuldig bevind aan die moord op Muziwakhe Sibiya, die hoof van die Hoërskool Mqiniseni.
Sikhakhane het aan die hof gesê hy het die hulp van sy vriend Philani Ntuli (36) ingeroep om te help om die moord op 17 Februarie 2022 uit te voer. Ntuli, ’n veiligheidswag, het skuld beken dat hy die noodlottige skote afgevuur het.
Sikhakhane het in sy skulderkenning gesê hy het bedank as ‘n onderwyserassistent. Hy het Sibiya kwalik geneem dat hulle hom nie ‘n permanente pos aangebied het nie.
Sikhakhane het gesê nadat hy drie jaar lank gewerk het, was hy gegrief en oorwerk en voortdurend onder druk. Hy het gesê hoewel hy dit by sy toesighouer aangemeld het, is niks aan sy situasie gedoen nie, en hy het in Mei 2021 bedank.
Hy het besluit om Sibiya te vermoor en Ntuli gewerf om hom te help. Albei het ‘n vuurwapen gaan leen om hulle in hul plan by te staan.
’n Dag voor die moord op 16 Februarie 2022 het Sikhakhane Sibiya gebel om hom te ontmoet. Toe hy daar aankom, het Sikhakhane hom gevra om Ntuli ‘n saamrygeleentheid te gee en hom langs die pad te laat val. Sibiya het ingestem, en albei mans het in die motor gespring.
Ntuli het op die agtersitplek gesit en was met ‘n vuurwapen gewapen. Sikhakhane het op die voorste passasiersitplek gesit. Langs die pad het Sibiya vir Sikhakhane gevra om vir hom kos te koop, en hulle het by die winkel gestop.
Nadat hulle na die voertuig teruggekeer het, het hulle verder op die R66 Hoofweg, Nongoma gery. Langs die pad het Sikhakhane vir Sibiya gevra om die voertuig te stop sodat hy kon urineer.
Toe die voertuig tot stilstand kom, het Sikhakhane uitgeklim terwyl Ntuli sy vuurwapen te voorskyn gebring het en verskeie skote op Sibiya afgevuur het en hom doodgemaak het.
Albei beskuldigdes het die oorledene van sy waardevolle besittings beroof, wat ‘n Samsung-tablet, ‘n S21-selfoon en ‘n skootrekenaar ingesluit het.
Albei mans, verteenwoordig deur advokaat Pauline Andrews, het 25 jaar vir moord en 15 jaar vir roof ontvang.
Regter Piet Bezuidenhout het gelas dat die vonnisse saamlopend uitgedien word.
Bronne: IOL, MSN, Flipboard
Volg FiND iT se Facebookblad hier en klik hier om ons app af te laai. Klik hier vir vandag se nuutste nuus.
Lees ook:Soektog na 6-jarige in oop mangat
