Die soektog na die vermiste voormalige burgemeester en boer van Verulam, Manna Naidoo (74), wat Woensdag ná ‘n vermoedelike plaasinval by sy huis verdwyn het, het tragies geëindig toe sy liggaam Donderdagoggend met koeëlwonde in ‘n suikerrietplantasie gevind is.
Die ontdekking is in die plantasie oorkant sy opstal in Canelands gemaak. Luitenant-kolonel Nqobile Gwala, polisiewoordvoerder, sê Verulam SAPD ondersoek klagte van moord, huisroof en ontvoering.
Gwala het gesê die klaagster het beweer sy het Woensdag na haar pa op ‘n plaas by Cottonlands in Verulam gegaan nadat sy die vorige aand laas met hom gepraat het.
Sy sê toe sy daar aankom, het sy opgemerk dat die huissleutels op die vloer was. “Toe sy instap, het sy ook opgemerk dat die kluis oop is. Kontant en vuurwapens wat in die kluis was, was gesteel. Die kluissleutels was op die vloer en die bakkie is ook gevat. ’n Soektog is gister (Woensdag) deur plaaslike polisie, polisiebeamptes van die soek-en-reddingseenheid en ander rolspelers uitgevoer,” het Gwala gesê.
“Vandag (Donderdag) om 11:00 het Verulam-polisiebeamptes ‘n deursoeking van die suikerrietlande gedoen toe hulle die liggaam van die ontvoerde slagoffer gekry het. Sy hande en bene was met ‘n tou vasgebind. Hy het skietwonde aan die kop opgedoen. Die motief vir die moord moet nog vasgestel word soos wat die ondersoek ontvou.”
Prem Balram, woordvoerder van die Reaksie-eenheid Suid-Afrika (Rusa), het gesê Naidoo het tydens die plaasaanval vermis geraak.
Balram het gesê sy familie het besef hy is vermis toe hulle hom wou besoek.
Hy het gesê ‘n intense soektog is Woensdag deur lede van Rusa, die Suid-Afrikaanse Polisiediens, gemeenskapsorganisasies en burgerlike vrywilligers uitgevoer en Donderdagoggend hervat.
“Naidoo se liggaam is deur ‘n soekspan gevind wat die suikerrietlande gepatrolleer het. Dit lyk asof hy verskeie kere geskiet is,” het Balram gesê.
Bronne: Daily News, The Citizen, IOL
Volg FiND iT hier.
Lees ook: Voormalige burgemeester van KZN vermis, nadat hy glo in plaasaanval geteiken is
