‘n Man in sy 40’s is Dinsdag in die vroeë oggendure verskeie kere in ‘n inbraak in die Boschkop-omgewing geskiet. Die aanval het op ‘n plot in Donkerhoek gebeur.
Net ná middernag het vyf verdagtes ‘n huis in die area binnegeval. Twee het toegang tot die huis gekry nadat hulle die venster gebreek het, het Boschkop GPF-voorsitter, Ross Welsh, verduidelik.
Hy het gesê daar was ‘n bakleiery. Verskeie skote is afgevuur en ‘n man is geskiet. “Die man is in beide sy linker- en regterbene geskiet. Gelukkig het die koeëls alle bene en are gemis. Hy is goed en stabiel,” het Welsh gesê.
Emer-G-Med paramedici het op ‘n oproep gereageer en die man met veelvuldige skietwonde aangetref.
Woordvoerder Kyle van Reenen sê die paramedici het die man op die toneel behandel en gestabiliseer voordat hy na ‘n nabygeleë hospitaal geneem is vir verdere sorg.
Volgens die eienaar van die erf, Ian MacDougall, het die gesin, ‘n man en vrou, hul drie kinders van 10 en sewe jaar en die ouma in die huis geslaap toe die verdagtes hulle aangeval het.
MacDougell woon 100 m van die huis af wat die gesin by hom huur.
Hy het gesê die verdagtes het die heining na die eiendom geknip voordat hulle die venster van die huis gebreek het om binne te kom.
Toe hulle binne is, het die verdagtes in die slaapkamer begin waar die ouma wat by die gesin kuier, geslaap het. Die vrou het met die rowers baklei en om hulp begin skree.
“Een ou het in Afrikaans vir haar gesê om vir hulle haar selfoon te gee en ‘n ander het verskeie kere gesê hy sal haar skiet. Die vrou se seun het uit sy kamer gekom en is deur een van die verdagtes voorgekeer. ’n Vuurwapen is op sy bors gerig. Gelukkig kon hy dit wegslaan en die koeël het die grond getref,” verduidelik MacDougell.
Die seun het met die verdagtes baklei en dit het daartoe gelei dat hy in die bene geskiet is.
Hy het daarin geslaag om by sy gemeenskapsradio uit te kom om hulp te ontbied.
Die verdagtes het weggehardloop en terwyl hulle die huis verlaat het, het hulle ‘n skoot afgevuur.
Boschkop-polisiewoordvoerder, sers. Yeroboam Mbatsene, het die aanval bevestig.
Hy het gesê die polisie ondersoek ‘n saak van poging tot moord en gewapende roof.
Bronne: The South African, Flipboard
Volg FiND iT hier.
