Die Amerikaanse akteur en sanger Neil Patrick Harris het om verskoning gevra vir ‘n onsmaaklike grap wat hy in 2011 oor die oorlede sangeres Amy Winehouse gemaak het.
Die Back to Black-sangeres is in Julie 2011 weens alkoholvergiftiging dood. In dieselfde jaar het Harris en sy man, David Burtka, ‘n Halloween-partytjie gehou wat ‘n vleisbord gehad het wat gemaak is om soos “The Corpse of Amy Winehouse” te lyk.
Elf jaar nadat die How I Met Your Mother-akteur die grap oor Winehouse gemaak het, het dit weer kop uitgesteek.
Harris het destyds baie kritiek daaroor op sosiale media gekry, aangesien aanhangers die grap “onsmaaklik” gevind het.
Volgens Buzzfeed News was Jesse Tyler Ferguson en sy huidige man, Justin Mikita, gaste by Harris se partytjie.
Mikita het destyds ‘n foto van die bord op Twitter gedeel en dit weer vinnig afgehaal. “Kyk wie het gisteraand @ActuallyNPH & @GourmetMD se Halloween-partytjie opgedaag. Lyk goed,” lui die geskrapte twiet.
Die publikasie berig dat die grafiese vleisbord ‘n “bloederige uitbeelding van ‘n verrottende en bebloede lyk” getoon het. Wat dit weggegee het, was Winehouse se ikoniese byekorf-kapsel, ‘n blik op haar tatoeëermerke en ‘n handgeskrewe beskrywing wat langsaan geplaas is wat lees: “The Corpse of Amy Winehouse.”
Alhoewel baie wat dit gesien het, aangeneem het dat dit ‘n koek is, het die nota dit beskryf as “beesrib, fyn varkvleis, hoenderwors in ‘n pikante BBQ-sous.”
Volgens Entertainment Weekly het Harris sedertdien om verskoning gevra vir die grap wat van slegte smaak getuig het.
Bronne: MSN, Rolling Stone
Lees ook: Noordwes-gemeenskap verbrand taxi’s nadat bestuurders ‘nuwe reël’ afdwing
