Hillary Gardee se familie het Vrydag die inhegtenisneming van ‘n man wat met haar brutale moord verbind word, verwelkom.
Hillary is die dogter van die voormalige EFF-sekretaris-generaal, Godrich Gardee.
Die man, tussen die ouderdom 30 en 40 jaar, is in Schoemansdal in hegtenis geneem.
Sinawo Thambo, woordvoerder van die EFF en Gardee-familie, het gesê die familie verwelkom die arrestasie van die man in die moordsaak van Hillary Gardee en is dankbaar dat die polisie hul eie teiken bereik het om binne 72 uur ‘n arrestasie te maak.
Hy het ook gesê hulle sal dit respekteer dat die man eers in die hof moet verskyn en aangekla moet word voordat sy identiteit bekend gemaak kan word.
Mpumalanga-polisiekommissaris, lt.genl. Semakaleng Daphney Manamela, het Vrydagaand aan die media gesê die ondersoek duur steeds voort.
“Tot dusver het ons daarin geslaag om een manlike verdagte by Schoemansdal in Nkomazi binne die 72-uur wat ons gegee is in hegtenis te neem. Ons glo dat ons die regte verdagte het en ons sien uit daarna om nog arrestasies te maak soos die ondersoek voortduur.”
Die verdagte staar ‘n moordklag in die gesig, en nog aanklagte kan teen hom bygevoeg word soos die ondersoek voortgaan.
Die man sal na verwagting Maandag 9 Mei 2022 in die Nelspruit-landdroshof verskyn.
Manamela was vol vertroue die polisie het die regte persoon in hegtenis geneem en het gesê dit is moontlik dat nog arrestasies binnekort gemaak kan word.
Bronne: Daily Star, MSN
Volg FiND iT hier.
Lees ook: Polisie het kritieke bewysstuk op Hillary Gardee se moordmisdaadtoneel gemis, sê familie en EFF
