Voorlopige reëls vir die Cravenweek-proewe is dat 0/13 seuns bewys moet kan lewer van inenting. Dié direktief is vanaf SARU ontvang. Daar is ‘n vergadering Maandagaand waarna daar meer duidelikheid sal wees. Dit geld egter nie vir ligawedstryde nie en ook nie vir die 0/12’s nie. Slegs vir toernooie sal bewys van inenting gevra word.
Die veiligheid van dié inenting vir 13-jariges is egter nog glad nie bewys nie. Daar is toenemende studies wat bewyse gelewer het van ‘n seldsame hart-inflammasie wat veral by seuns na inenting gesien word.
Volgens MayoClinic het die Amerikaanse voedsel- en dwelmadministrasie (FDA) magtiging gegee vir ‘n Pfizer-BioNTech Covid-19 entstof vir ouderdom 12 tot 15. Hierdie entstof behels twee dosisse. Die tweede dosis kan drie tot agt weke na die eerste dosis gegee word. Dit bevat dieselfde dosis as die Pfizer-BioNTech Covid-19 entstof vir kinders van 16 en ouer.
Gesonde seuns kan meer geneig wees om in die hospitaal opgeneem te word met ‘n seldsame newe-effek van die Pfizer/BioNTech Covid-entstof wat ontsteking van die hart veroorsaak as met Covid self, beweer Amerikaanse navorsers. Dié seldsame effek word miokarditis genoem. Hul ontleding van mediese data dui daarop dat seuns van 12 tot 15 jaar oud, sonder onderliggende mediese toestande, vier tot ses keer meer geneig is om met entstofverwante miokarditis gediagnoseer te word as om oor ‘n tydperk van vier maande met Covid in die hospitaal te beland. Die meeste kinders wat dié seldsame newe-effek ervaar het, het simptome gehad binne dae na die tweede toediening van Pfizer/BioNTech-entstof, alhoewel ‘n soortgelyke newe-effek met die Moderna-entstof gesien word. Ongeveer 86% van die seuns wat geraak is, het hospitaalversorging benodig. Die JCVI het nie aanbeveel dat gesonde 12- tot 15-jariges ingeënt word nie, maar het die saak na die VK se mediese hoofbeamptes verwys wat na verwagting volgende week ‘n finale besluit sal neem. In die jongste studie, wat nog eweknie-geëvalueer moet word, het dr. Tracy Høeg aan die Universiteit van Kalifornië en kollegas nadelige reaksies op Covid-entstowwe by Amerikaanse kinders van 12 tot 17 jaar oud gedurende die eerste ses maande van 2021 ontleed.
Volgens New York Times het Israeliese navorsers Woensdag berig dat veral seuns van 12 tot 15 ‘n klein maar verhoogde risiko van hartprobleme toon nadat hulle ‘n tweede dosis van dié Pfizer-BioNTech-entstof ontvang het. Miokarditis is gesien binne ‘n week nadat hulle ‘n tweede dosis ontvang het.
Ten tye van publikasie het SARU nog geen kommentaar gelewer op dié direktief nie.
