Jan Morrison (44) van Bloemfontein se hond, Dozer, is as Trail Dog of the Year genomineer en hardloop gereeld roetes saam met Morrison.
Morisson en sy vrou, Ella, het twee kinders, Mia (12) en Erik (8).
Morrisson boer met beeste op ‘n plaas in Winburg en het in 2015 begin draf omdat hy sy kop wou skoonkry met die droogte wat boere in dié tyd ervaar het. “Ek hardloop omtrent uitsluitlik net roetes. Dozer is vyf jaar oud en hardloop saam met my vandat hy ses maande oud was.”
Morrison vertel dit het toevallig, weens sekuriteitsredes op die plaas gebeur dat Dozer saam met hom begin hardloop het. “Ek het toe agtergekom dat hy mal is daaroor en van daar af vra ek maar gereeld wanneer ek by ‘n geleentheid gaan deelneem, of hy saam met my mag hardloop.”
Morrison vertel Dozer is mal daaror om roetes te hardloop. “Die klomp mense, nuwe terrein en die hardloop is vir hom baie lekker. Hy het selfs sy eie Strava-profiel om te help wanneer organiseerders wil weet of hy so ver kan hardloop.”
“Hy is my motivering om op te staan as ek te lui is!”
Dozer het al die 38 km-SkyRyn saam met Morrison gehardloop, en ook die War Trail van 58 km en die Mnweni Berg-marathon.
“Hy hardloop altyd saam my. Kinders geniet altyd om hom te sien by geleenthede en hy geniet ook die aandag!”
Twee naweke gelede het Dozer die laaste 42 km van die SkyRun se 100 km saam met Morrison voltooi..
“Ek het deur die aand begin koud word en ‘n bietjie deurmekaar geraak. Dozer het my gehelp tot by mense, waar hulle kon hulp ontbied.”
Morrison vertel sy groot droom vir Dozer is dat hy die volledige 100 km van die SkyRun saam met hom voltooi. “Hy is fiks genoeg vir die afstand, maar die feit dat hy lang hare het (White Swiss Shepherd) maak hitte ‘n probleem. Hy kort baie water om in af te koel. ‘n Hond sal homself tot die dood toe hardloop vir sy eienaar.”
“Vir my persoonlik is dit lekker om somtyds alleen in die berge te wees saam met hom. Jy het geselskap sonder om te gesels!”
Trail Magazine het kategorieë vir elke jaar, waarvan Trail Dog of the Year een is.
Volg FiND iT hier op Facebook.
