OOS-LONDEN. – Die vonnisverrigtinge vir die saak van ‘n Oos-Londense prokureur, wat gister deur die Makhanda-hooggeregshof skuldig bevind is vir die verkragting en aanranding van sy vrou, duur steeds voort.
Die 49-jarige prokureur is gister 16 November 2021 daaraan skuldig bevind dat hy sy vrou twee keer, in Februarie 2012 en in Mei 2019, verkrag het. Hy is verder skuldig bevind aan twee aanklagte van aanranding met die doel om ernstig te beseer.
Gebrek aan kriminele kapasiteit
Anelisa Ngcakani, woordvoerder vir die NPA, sê Regter Judith Roberson het in haar uitspraak die prokureur se verweer dat hy ‘n gebrek aan kriminele kapasiteit het, wat veroorsaak is deur ‘n kombinasie van alkoholmisbruik en ‘n diagnose van aandaggebrek-hiperaktiwiteitsversteuring (ADHD), verwerp. Regter Roberson het tot die gevolgtrekking gekom dat sy optrede gefokus en doelgerig was.
Pornografie
“Die man het ook in die hof erken dat hy dit geniet om na gewelddadige pornografiese materiaal te kyk en bygevoeg dat van die gewelddadige seksuele dade wat hy op sy vrou uitgevoer het, met haar toestemming gedoen is. Regter Roberson het egter die weergawe van die slagoffer aanvaar, vanweë die feit dat dit met bewyse gestaaf is.”
Bakleiery
Ngcakani sê die man en sy nou 46-jarige vrou was op 15 Februarie 2011 by hulle huis in Beacon Bay, Oos-Londen, toe sy boodskappe van ‘n ander vrou op sy selfoon ontdek het. “Sy het haar man gekonfronteer en ‘n fisieke bakleiery het ontstaan, waartydens hy haar aan die keel gegryp en met geweld teen ‘n skuifdeur gedruk het. Sy het beserings aan verskeie liggaamsdele opgedoen.”
Geweld
Sy sê ook verder dat die egpaar op 14 Februarie 2012, Valentynsdag, by ‘n gastehuis in Oos-Londen gevier het. “Die man het die laaste deel van die aand saam met ander gedrink, terwyl sy vrou gaan slaap het. Hy het deur die loop van die aand teruggekeer, haar wakker gemaak en seks geëis. Sy het geweier en hy het haar toe opdrag gegee om uit te trek sodat hy foto’s van haar kon neem. ’n Stoeiery het ontstaan en die man het sy vrou met geweld neergedruk, haar verwurg en haar kop teen die vloer geslaan. Hy het haar toe gedwing om na buite te gaan terwyl sy naak was. Daar het hy haar met ‘n tak geslaan. Toe hulle na hulle kamer terugkeer, het hy gewelddadige seksuele dade op haar uitgevoer, wat verkragting ingesluit het. Hy het haar gedwing om orale seks op hom toe te pas. Sy het die mishandeling by haar dokter en haar ma aangemeld.”
Tweede voorval
“Sewe jaar later, op 11 Mei 2019, het die egpaar ‘n funksie in Oos-Londen bygewoon, waar die aangeklaagde alkohol gedrink het. Hy het later die aand, by hulle huis, weer seks van haar geëis en sy het geweier. Hy wou foto’s van haar neem, aangesien sy naak was,” verduidelik Ngcakani.
“Sy het toe probeer om die foon te gryp, maar die man het haar aan die keel gegryp, haar met sy knieë vasgepen en gewurg. Hy het haar toe na hulle slaapkamer geneem waar die aanranding voortgeduur het. Hy het verdere gewelddadige seksuele dade op haar uitgevoer, wat verkragting ingesluit het. Die man het video’s van hierdie misdade met sy vrou se selfoon geneem. Hy het toe die video’s met WhatsApp na sy foon oorgedra. Sy het die volgende dag haar ma van die voorval vertel en die man is ‘n paar dae later in hegtenis geneem.”
