Jozette Calitz (16) het vir die eerste keer in haar lewe op ’n perd gesit toe sy maar net ses maande oud was.
Sy vertel sy het haar liefde vir perdry by haar ma en susters aangeleer.
“My ma en susters het perd gery nog voor ek gebore is. Dit is waar ek my liefde vir perde gekry het. ’n Perd kan in ’n mens se siel inkyk.”
As gebore Kimberliet is Jozette ’n graad 10-leerling by Hoërskool Adamantia en het haar eerste voltooide uithourit in graad 6 met haar perd, Boesman, gedoen.
“In graad 4 het my perd by ’n boeresportoefening van die perdeklub geskrik en met my weggehardloop. Ek het na ’n ruk afgeval en was vir lank bang om weer op ’n perd se rug te klim.”
Jozette vertel sy het baie drome wat sy nog met perdry wil bereik.
“Ek wil graag Walvisbaai se uithourit in die duine voltooi. Ek sal graag ’n nuwe rekord wil opstel by Suid-Afrika se grootste uithourit in Fauresmith. Ek wil ook eendag meer as twee meter met ’n perd spring in ’n kompetisie en graag my Springbok-kleure vir uithouritte kry.”
Sy het ook al meer as 18 keer geval en het haar hand gebreek toe honde haar in die veld gejaag het terwyl sy uithouritte geoefen het.
“Ek spring nou vir pret met een van my perde, maar Arabiere spring nie regtig nie en as hulle dit doen, spring hulle nie baie hoog nie. Ek het al dit reggekry om 1,1 meter hoog te spring met my merrie wat baie hoog is vir ’n Arabier.”
“Baie mense sal jou probeer afkraak as jy nie so goed begin met ry nie, maar almal sukkel en dit neem tyd, maar jy sal daar kom deur harde werk en passie. Jy sal soms val, maar wat saak maak, is dat jy weer opklim.”
