JOHANNESBURG. – Julius Malema, die EFF-leier, het Donderdag die party se mening gelug oor hoe die regering die Covid-19-pandemie hanteer.
Volgens Eye Witness News het die EFF die regering gevra om die opening van skole uit te stel om die kinders teen die virus te beskerm.
“As EFF staan ons die gedobbel met die lewens van kinders teen ‘n virus wat die hele mensdom nog nie goed verstaan nie, teë. Dit sal uiters pynlik wees as gesinne hul kinders begin verloor omdat ons as leiers nie die situasie waarin ons verkeer, respekteer en die toekoms van ons land bewaar nie.”
Malema het ook gevra om die verkiesings, wat later die jaar moet plaasvind, te skuif. “Soos sake nou staan, het Covid-19 ons hele lewens onvoorspelbaar gemaak. ‘n Situasie wat elke politieke party se vermoë om met kiesers in gesprek te tree, ondermyn het, as gevolg van vrees om deel te wees aan die verspreiding van die virus.”
“Ons vra daarom dat alle verkiesings, tussenverkiesings en verkiesings vir plaaslike regering tot 2024 uitgestel word, aangesien verkiesings as superverspreidingsgebeurtenisse beskou kan word.”
Malema het verder verwys na die sluiting van die landgrense. Hy sê deur dit oop te hou, word blankes en Europeërs gelukkig gehou.
