Net omdat jy in lockdown is en nie by die gimnasium kan uitkom nie, beteken nie dat jy nie moet oefen nie. Oefening is belangriker as ooit, vir elke aspek van jou welstand.
Hoekom is oefening belangrik vir jou fisieke en geestelike gesondheid?
Navorsing toon dat sittende gedrag jou fisieke en geestelike gesondheid ondermyn en jou immuniteit in gevaar kan stel – iets wat jy nie kan bekostig as jy die coronavirus tydens hierdie dodelike Covid-19-pandemie wil afweer nie.
Die Wêreldgesondheidsorganisasie berig dat persone wat meer aktief is ’n kleiner kans het om te sterf. Hulle het ook minder koronêre hartsiektes, hoë bloeddruk, beroerte, tipe 2-diabetes, metaboliese sindroom en sal waarskynlik minder risiko hê vir ‘n heup- of werwelbreuk.
Die WGO beveel ten minste 150 minute aërobiese liggaamlike aktiwiteit met matige intensiteit gedurende die week aan – net meer as 20 minute per dag – saam met spierversterkende aktiwiteite twee of meer dae per week.
Oefening verlaag ook inflammasie in jou liggaam en bevorder die vrystelling van groeifaktore soos breinchemikalieë wat die gesondheid en ontwikkeling van breinselle en bloedvate in die brein beïnvloed. Dit bevorder ook die vrystelling van voelgoed-endorfiene, verhoog jou bui en bekamp stres.
Hoekom oefening juis belangriker is tydens Covid-19
Dit is van die uiterste belang, veral nou. Oefening help om jou immuunstelsel optimaal te laat werk, deur bakterieë uit jou longe en lugweë te spoel, om die bloedsomloop van die witbloedselle te verhoog en om jou liggaamstemperatuur te verhoog, wat jou liggaam dan help om infeksie te beveg.
Idees wat jou sal help om tydens lockdown by die huis te oefen
Jy kan aërobiese oefening doen deur op die plek te draf vir ’n paar minute, trappe op en af te klim/draf of selfs om in die tuin te hardloop. Jy kan selfs touspring.
Vir weerstandoefeninge om spiere te versterk, kan jy squats, lunges of push-ups doen. “Jy moet spiergroepe afwissel om jou hartklop egalig te behou en spieruithouvermoë op te bou,” sê Hayley Cassim, fiksheidskonsultant van Durban in Gym in a Box.
Verken die vele gratis oefensessies en -video’s wat nou beskikbaar is op YouTube. Daag familie en vriende uit om virtueel by jou aan te sluit vir motivering en plesier.
