’n Span van 217 gesondheidswerkers het gister vanuit Kuba in Pretoria aangekom. President Cyril Ramaphosa het die Kubaanse president, Miguel Diaz-Canel, se hulp gevra in Suid-Afrika se stryd teen Covid-19.
Die groep bestaan uit epidemiologie-, biostatistiek- en openbare gesondheidskenners, dokters wat met toetsing en toesig leiding sal neem, ingenieurs wat gesondheidsorgtoerusting in stand sal hou en kenners wat tegniese raad aan plaaslike kenners sal gee.
“Die Kubane sal baie beteken vir die toetsingsprosesse in gemeenskappe, want dis hulle sterkpunt,” sê Mosa Moshabela, dekaan van die Universiteit van KwaZulu-Natal se departement van verpleegkunde en openbare gesondheid.
