SUID-AFRIKA – Die polisie het op 18 Februarie 2020 ’n belangrike versoek op hul Facebook-blad gedeel. Ouers moet hul kinders afraai om deel te neem aan die gevaarlike sosialemedia-tendens.
Met soveel sosiale media-toepassings beskikbaar, is dit moeilik om die potensiële gevare raak te sien.
Deur kinders te leer oor internetveiligheid, bewus te wees van hul aanlyngewoontes en hulle na toepaslike webwerwe te begelei, kan ouers seker maak dat hul kinders veilige en verantwoordelike gebruikers op sosiale netwerke word.
’n Gevaarlike sosiale media-uitdaging wat wêreldwyd voorkom, het in Pretoria kop uitgesteek. Dit staan as die skedelbreker-uitdaging bekend. Drie kinders sal langs mekaar staan en in die lug spring en die persoon in die middel, wat in die lug spring, se voete word onder hom of haar uitgeskop. Dit veroorsaak dan dat die persoon in die middel op hul rug en kop land sonder om die val te kan keer.
Daar is verskeie berigte oor kinders wat as gevolg van hierdie gevaarlike sosiale media-neiging ernstig beseer is.
Xander Loubser, woordvoerder van die Best Care-ambulansdiens, sê die skedelbreker-uitdaging kan lei tot ernstige mediese gevolge.
Loubser sê: “As jy direk met jou kop op ’n harde oppervlak beland, kan dit ’n skedelbreuk of ’n ruggraatbreuk tot gevolg hê. Dit kan tot gestremdheid of selfs na die dood lei.” Loubser het ouers aangeraai om hul kinders teen die gevare van die skedelbreker-uitdaging te waarsku.
