Die Suid Afrikaanse Lugdiens het bevestig dat vlugte gekanselleer is om geld te spaar as gevolg van ’n lae aanvraag. Verskillende binnelandse vlugte is gekonsolideer en verskeie internasionale vlugte gekanselleer. Binnelandse passasiers sal tydelik deur Mango uitgehelp word om so min as moontlik mense te ontwrig.
Daar is in totaal 28 binnelandse vlugte tussen Johannesburg en Durban en Johannesburg en Kaapstad gekanselleer. Dienste tussen Johannesburg en Munich is ook gekanselleer. Passasiers wat op hierdie vlugte moes wees, sal geakkommodeer word deur die SAL-dienste tussen Johannesburg en Frankfurt, sowel as Londen Heathrow.
Die Suid Afrikaanse Lugdiens sal in die komende dae verdere moontlike wysigings aan die vlugskedule hersien.
